DILI, 08 Jullu 2025 (TATOLI)–Atleta Karate-do hamutuk na’in-haat husi Federasaun Karate-do Timor-Leste (FKTL) sei partisipa iha jogu Komunidade Nasaun Lian Portugés (CPLP-sigla portugeza).
Sekretáriu Jerál FKTL, António Carlos de Araújo, esplika atleta na’in-haat referida idade U-16 ne’ebé hahú halo preparasaun iha fulan-Maiu no hetan asisténsia direta husi treinadór inklui fasilita husi Komisaun Organizadora Jogu CPLP.
“Sira kontinua halo preparasaun, deskansa iha otél ne’ebé fasilita husi Governu liuhusi Komisaun Organizadora,” Sekretáriu Jerál FKTL informa ba TATOLI iha Jináziu, tersa ne’e.
António Araújo haktuir katak durante halo preparasaun Federasaun prepara atleta na’in-ualu iha-ne’ebé na’in-haat seluk tenke elemidadu tanba bazeia ba númeru atleta no tuir kategoria.
Aleinde ne’e, atleta na’in-haat ne’ebé selesionads kontinua treinu rutina hanesan prepara fízika, téknika no sistema jogu hodi nune’e prepara di’ak liután hasoru adversáriu husi nasaun CPLP.
“Ita-nia esperansa sira hatudu jogu esportivu no hatudu prestasaun iha kompetisaun ne’e,” António Araújo akresenta.
FKTL kontinua fó konfiansa ba atleta na’in-haat referida liuliu motiva atu hatudu prestasaun tanba jogu CPLP lori Timor-Leste nia naran mezmu sei hasoru adversáriu husi nasaun hitu seluk ne’ebé konsideradu forte no kompetitivu.
Atleta na’in-haat ne’ebé sei jogu iha CPLP kompostu Nencia Gusmão sei jogu iha kategoria klase kilógrama 48, Marica Mota klase kilógrama 53, Alexandrino Messi klase kilógrama 55 no Eugénio Soares sei jogu iha kategoria klase kilógrama 60.
Entretantu, jogu CPLP sei realiza iha Timor-Leste no sei partisipa husi nasaun hitu ho totál atleta hamutuk 535 ne’ebé halo preparasaun iha faze tolu hanesan interna, prepara realizasaun no ezekusaun ne’ebé sei halo abertura iha loron 17-27 Jullu tinan ne’e.
Jornalista: Natalino Belo
Editór: Xisto Freitas da Piedade
