DILI, 10 Jullu 2025 (TATOLI)-Tribunál Primeira Instánsia Suai, sesta liuba la konsege realiza julgamentu dahuluk ba José dos Santos Naimori Bucar nu’udar suspeitu ba krime furtu (foti komunidade nia fatuk lulik) iha área postu administrativu Hato-Udu, munisípiu Ainaru, iha 2023 liuba.
“Parte ofendidu sira-nia advogadu mak la marka prezensa, tanba ne’e mak tribunál deside halo adiamentu ba kazu ne’e”, advogadu Naimori, Ismael de Asunção, hateten ba TATOLI iha Tribunál Judisiál Primeira Instansia Dili, Kaikoli, kinta ne’e.
Ismael ladún hatene razaun tanbasá mak defeza la marka prezensa. Maibé, nia esplika regra prosesuál katak, julgamentu ba kazu ida kuandu advogadu la marka prezensa entaun tribunál pronúnsia julgamentu ne’e halo adiamentu.
“Kazu ne’e tribunál judisiária primeira instansia Suai adia ba dia 27 Jullu 2025 hodi halo primeiru julgamentu”, nia informa.
Rekorda fali katak Departamentu Investigsaun Kriminál (DIK) Nasionál iha segunda (15/7/2024), ezekuta mandadu Tribunál Judisiál Primeira Instánsia Suai (TJPIS) ho NUC 0004/23. ANHT halo buska no apreensaun ba rezidénsia José dos Santos Naimori Bucar iha Soru-Kraik, postu administrativu Ainaru Vila, munisípiu Ainaru, tanba krime furtu agravadu ne’ebé previstu iha kódigu penál Timor-Leste nian, artigu 252.
Krime ne’e atribui tanba foti fatuk lulik iha aldeia Bove, bairru Fatuk Kabelak iha postu administrativu Huto-Udu, munisípiu Ainaru iha 2023. Fatuk lulik refere daudaun ne’e iha Naimori nia rezidénsia hodi uza ba enfeita.
Komunidade Bove Bairru Fatuk Kabelak iha postu administrativu Hutudo keixa Naimori ho krime furtu agravadu tanba konsidera fatuk lulik ne’e rai iha fatin sagradu iha postu administrativu Hato-Udu.
Notísia relevante: TDM adia julgamentu ba Naimori ho kazu furtu agravadu
Jornalista : Natalino Costa
Editora : Rita Almeida
