BOBONARU, 16 Jullu 2025 (TATOLI)—Autoridade Munisípiu Bobonaru (AMB) halo ona koordenasaun ho diretór kompañia E724 Unipessoál, Lda atu halo reabilitasaun ba morru protesaun iha merkadu Mau-mali ne’ebe ai monu hanehan hafoin akontese anin-boot iha fulan kotuk.
Diretór Servisu Munisipál Jestaun Merkadu Autoridade Munisípiu Bobonaru, Paulo dos Santos hateten akontesimentu ne’e ema hotu la espera maibé iha relasaun ho kompañia E724 ne’ebé konstrui edifísiu Sentru Solidariedade Sosiál Delegasaun teritoriál Munisípiu Bobonaru.
“Ami halo ona koordenasaun no aprezenta ona ba Sekretáriu Planeamentu depois tékniku sira mós ba haree. Konfirmadu katak kompañia ne’e atu konstrui filafali halo tomak,” nia informa ba jornalista sira iha nia kna’ar-fatin, Kuarta ne’e.
Ba asuntu ne’e, TATOLI tenta halo konfirmasaun ho kompañia E724 Unipessoál, Lda maibé responsavel másimu husi kompañia referida laiha terrenu.
Morru protesaun merkadu Mau-Mali ne’e Autoridade Munisípiu Bobonaru kontrata kompañia lokál Lesuburo Unipesoál, Lda halo konstrusaun ho distánsia luan metru 400 no naruk metru 400 ho totál orsamentu $184.718,13 ne’ebe finansia husi orsamentu Planu Dezenvolvimentu Integradu Munisipál (PDIM) tinan 2024.
Jornalista: Sergio da Cruz
Editór: Xisto Freitas da Piedade
