DILI, 22 Jullu 2025 (TATOLI) – Prezidente Federasaun Karaté husi Kabuverde, Alcinda Lima, hateten alteta sira preparadu atu partisipa iha jogu iha modalidade Karaté-do, nune’e otimista lori rezultadu di’ak.
Kabuverde iha atleta na’in-haat, kompostu husi feto rua no mane rua, ne’ebé sei kompete iha modalidade ne’e.
“Iha esperansa ba jogu atu lori rezultadu estraordináriu. Bele lori medalla ba Kabuverde”, nia hateten ba Tatoli, iha Sentru Konvensaun Dili, ohin.
Tuir nia, Jogu Desportivu Komunidade Nasaun Ko’alia Lian Portugés (CPLP) ne’e atu hametin amizade entre povu no nasaun-membru sira.
Iha sorin seluk, Sekretáriu-Jerál Karaté husi Angola, Ernesto Miguel Domingos, hateten atleta sira iha preparasaun di’ak ba modalidade Karaté-do. Nia dehan Angola iha atleta feto rua no mane rua. “Esperansa ba Angola lori medalla osan-mean”, ko’alia otimista.
Nia sente kontente partisipa iha eventu ne’e no louva Timor-Leste no povu ida ne’ebé tane bainaka sira ho di’ak no fó atensaun boot, prestativu no buka meiu hotu.
Tuir nia, lasu amizade entre povu no nasaun CPLP kria ona, nune’e faktu indikativu Angola aliña ho país membru hotu hodi fortalese lasu iha kada atividade, liuhusi modalidade oioin iha eventu referidu.
Nasaun ne’ebé konfirmada atu kompete iha modalidade Kareté-do mak Portugál, Mosambike, Saun Tomé no Prínsipe, Kabuverde, Angola no Timor-Leste. Tuir órariu, jogu ba modalidade ne’e sei hala’o iha loron 24-25 Jullu tinan ne’e.
Notísia relevante: Karate-do Timor-Leste preparadu no sei hatudu rezultadu di’ak
Jornalista: Nelson de Sousa
Editora: Maria Auxiliadora
