DILI, 22 Jullu 2025 (TATOLI)-Kompetisaun korida 100 metru fahe ba kategória mane no feto, husi feto lidera husi Saun Tomé e Prínsipe ne’ebé konkore husi atleta Adjamila Boa Esperança, enkuantu mane lidera husi Angola, ne’ebé konkista husi atleta Eduardo Pedro da Silva.
Segundu lugar ba feto okupa husi atleta, Adlézia Neto Trindade (Saun Tomé e Prínsipe) no iha terseiru lugar okupa husi atleta Ilisiaria Brito Lopes (Kabuverde), enkuantu iha fali korida 100 metru ba mane (maskulinu), atleta Pedro Marques Ecumbi (Angola) mak okupa iha segundu lugar no iha terseiru lugar nian okupa husi atleta Delfin Francisco Soares Ganeto (Kabuverde).
Tuir atleta Saun Tomé e Prínsipe ne’ebé sai vensedora korida 100 metru (femenina), Adjamila Boa Esperança, hateten sente kontente tanba bele hetan medalla osan-mean, aleinde ne’e mós ida-ne’e hanesan kompetisaun dahuluk ba nia.
“Ha’u kontente no louva mai ha’u-nia an no mós ba treinadór sira ne’ebé durante ne’e bele motiva bainhira hala’o hela treinu”, atleta ne’e informa ba jornalista sira iha estádiu munisipál Dili, ohin.
Nia dehan, oportunidade ida-ne’e sei la repete tan tanba ne’e nia sei kontinua esforsu treinu nafatin hodi mellora di’ak liután ninia performe bainhira partisipa tan iha kompetisaun internasionál seluk.
Nune’e mós tuir atleta vensedór korida 100 metru (maskulinu), Eduardo Pedro da Silva, dehan agradese bele partisipa iha kompetisaun ida-ne’e, maske nia ho kondisaun ne’ebé ladun di’ak ba matan, maibé nia konsege finaliza duni ninia halai to’o faze finál (meta).
“Maske kompetisaun ida-ne’e hanesan manán daruak nian ona tanba antes ne’e mós ha’u konsege kompete iha nivél internasionál balun, maibé agradese ohin bele manán tan medalla ba ha’u-nia rai Angola”, nia hateten.
Nune’e mós tuir Tékniku Federasaun Atletismu São Tome Prinsipe, Fernando Taraveira, hateten nia sei esforsu hodi kontinua fó treinu no motivasaun nia atleta sira hodi rekolla medalla barak liután iha kompetisaun ba loron aban nian.
“Ha’u hakarak aumenta tan medalla rua ba Saun Tomé e Prínsipe, espera buat ne’ebé ha’u mehi bele sai realidade”, nia espresa.
Entretantu totál atleta ne’ebé kompete iha korida 100 metru (femenina no maskulinu) hamutuk 10 ne’ebé kompostu husi atleta mane nain-haat no atleta feto nain-neen.
Notísia relevante: Angola okupa klasifikasaun dahuluk ba modalidade atletismu iha loron daruak
Jornalista : Alexandra da Costa
Editora : Rita Almeida
