DILI, 22 Jullu 2025 (TATOLI)-Atleta Portugál, Rodrigo João Guedes Azevedo, kontinua lidera kompetisaun hala-taru iha 3000 metru ba mane.
Enkuantu, segundu lugar okupa husi atleta Kabuverde, Alerson Patrick Nascimento Silva no terseiru lugar konkista husi atleta Timor-Leste, Júlio Martins Amaral, iha modalidade atletismu iha jogu desportivu Komunidade husi Nasaun sira ne’ebé ko’alia lian-portugés (CPLP, sigla portugés).
Kompetisaun ida-ne’e atleta nain-lima mak kompete hanesan, Júlio Martins Amaral (Timor-Leste), Pascoal de Jesus Exposto (Timor-Leste), Rodrigo João Guedes Azevedo (Portugál), Alerson Patrick Nascimento Silva (Kabuverde) no atleta ida husi Angola.
Atleta Portugál Rodrigo João Guedes Azevedo kontente bele oferese medalla osan-mean (ouru) ba nasaun Portugál liuhusi kompetisaun korida 3000 metru nian.
“Ha’u sente kontente tebes, tanba ha’u mai la saugati, bele lori rezultadu di’ak ba ha’u-nia rai, maske ohin iha ronde dala-haat atleta husi Kabuverde esforsu liu ha’u, maibé ha’u mós kontinua esforsu hodi halakon nia iha minutu ikus”, atleta ne’e espresa ba jornalista sira iha estádiu munisipál Dili, ohin.
Nia dehan, nafatin iha oportunidade hodi kontinua treinu no aprende esperénsia balun husi atleta sira seluk duerante jogu CPLP.
Entretantu iha klase ida-ne’e atleta sira sei halai haleu kampu ho etapa dala-neen, enkuantu iha etapa ikus nian mak sei determina manán nain ba kompetisaun ida-ne’e, tanba ne’e durante kompetisaun la’o atleta sira halai ho velosidade neneik hodi kontrola sira-nia iis, maibé to’o iha etapa ikus nian sira komesa halai ho velosidade maka’as hodi konkista iha meta.
Iha sorin seluk mós tuir atleta timoroan ne’ebé konkista iha terseiru lugár, Júlio Martins Amaral, hateten sente kontente tebes bele rekolla medalla osan metan (bronze) rua durante iha kompetisaun jogu desportiva CPLP.
“Ha’u orgullu sai manán nain datolu, tanba ne’e lafasíl bainhira ita hasoru atleta seluk mesak alturas no isin di’ak, maibé ha’u mós nafatin hatudu katak Timor mós bele kompete ho sira”.
Nia hatutan, ida-ne’e hanesan esperénsia di’ak ba nia satán nia foin mak primeiravez kompete iha nivél internasionál nian, entaun ne’e sai hanesan referénsia ba nia hodi kontinua mellora di’ak liután.
“Maske ha’u lahetan primeiru lugar maibé agradese bele oferese medalla rua ba timor”, nia hateten.
Tuir observasaun jornalista nian iha kampu durante kompetisaun ne’e la’o atleta sira sei halai haleu kampu ho etapa dala-neen, no halai ho velosidade neneik hodi kontrola sira-nia iis, maibé to’o iha etapa ikus nian sira komesa halai ho velosidade maka’as hodi konkista iha meta.
Notísia relevante: Atleta 52 sei kompete iha modalidade atletizmu jogu desportivu CPLP
Jornalista : Alexandra da Costa
Editora : Rita Almeida
