DILI, 25 Jullu 2025 (TATOLI) – Jogu Deportivu Komunidade País Ko’alia Lian Portugés (CPLP, sigla portugés) iha modalidade voleiból praia termina ona iha loron 25 Jullu.
Maski iha kompetisaun ne’e Timor-Leste hetan segundu no terseiru lugar, maibé adeptu timoroan sira nafatin orgullu ho rezultadu ne’ebé atleta sira fó, tanba nasaun foin ba dahuluk partisipa iha eventu internasionál ne’e.
Iha jogu ne’e, atleta sira ne’ebé reprezenta nasaun mak hanesan Noeh Deo Gracias, Felisberto Faria, Miguela Pereira Ximenes no Augusta Belo. Iha modalidade ne’e, ekipa femenina no mista sai vensedór daruak no maskulina hetan terseiru lugar.
Enkuantu vensedór dahuluk iha modalidade ne’e mairia husi Portugál iha kategoria ekipa mista, femenina no maskulina.
Adeputu voleiból praia Alcino Menezes hateten nia parte akompaña jogu husi inísiu to’o ramata no observa katak Timor-Leste hatudu duni sira-nia forsa iha kampu no sempre hadau pontu maski adversáriu sira husi nasaun seluk forte liu.
“Nu’udar timoroan orgullu ho rezultadu Timor-Leste tanba hetan segundu no terseiru lugar. Ita hotu hakarak primeiru lugar maibé labele, tanba ekipa Portugál mais forte no treinadu”, Alcino Menezes dehan ba Tatoli kampu praia Lesidere Dili.
Ho rezultadu ne’ebé iha, nia rekomenda ba Governu atu iha futuru tenke investe ona joven sira ne’ebé iha talent, liuliu bele harii akademia atletizmu, nune’e jogadór sira bele treinu. Tanba haree husi jogu durante ne’e, timoroan sira iha duni abilidade, maibé presiza hadi’ak liután.
Tuir nia, Jogu CPLP ne’e sei kontinua no realiza iha nasaun seluk. Tanba ne’e, Timor-Leste bele bá partisipa no kompete iha modalidade sira no bele manán, liuliu futeból, tenis kampu, voleiból praia, karaté-do, taekwondo, xadres, basketeból no atletizmu.
“Governu tenek tau importánsia ba modalidade ualu ne’ebé tinan ne’e realiza ita-nia rai. Tanba modalidade sira ne’e mak sei nafatin kompete iha futuru mai”, nia sujere.
Iha fatin hanesan, Constantino Bianco, hateten husi Jogu CPLP fó vantajen boot ba Timor-Leste, liuliu foinsa’e sira oinsá bele hatudu sira-nia talentu iha jogu sira ne’e.
Nia halo komparasaun jogu iha modalidade ualu ne’e entre jogadór timoroan no nasaun sira seluk ne’e treinadu tebes.
“Ita la’ós labele. Modalidade hotu ita bele kompete, maibé ita-nia preprasaun mak ladún másims. Tanba ema mai ne’e treinadu, ita-nian dala-barak atu joga maka foin treinu, entaun diferensa husi parte ida-ne’e. Ita lakon iha jogu sira”, dehan.
Nu’udar timoroan nafatin solisita ba Governu atu hanoin ona halo mudansa ba iha área desportu, tanba dezenvolvimentu nasaun nian kontribui mós husi parte ne’e.
“Orgullu ho rezultadu jogu husi modalidade sira hotu, liuliu voleiból praia. Maski ita la hetan osan-mean, maibé bele manán osan-mutin no esperiénsia”, konklui.
Notísia relevante: Portugál sai kampeaun voleiból praia mistu hafoin halakon Timor-Leste
Jornalista: Arminda Fonseca
Editora: Maria Auxiliadora
