DILI, 25 Jullu 2025 (TATOLI) –Iha tinan-2026 sei hahú implementa reforma obrigatória iha administrasaun públika, reforma ne’e hanesan pasu ida hodi kontribui ba reforma administrasaun públika inklui mós setór sanitáriu, Reprezentante Prezidente Komisaun Funsaun Públika atuál Komisaria Funsaun Públika (KFP), Anita Tavares Oliveira de Jesus informa.
“Reforma obrigatóriu ne’e sei hahú ba funsionáriu hotu iha Funsaun Públika. Independentemente, husi nia rejime signifika inklui mós Profisionál Saúde sira. Ami rejista ona katak iha 100-resin liu-liu Profisionál Saúde mak Enfermeiru, Parteira no Tékniku aliadu sira sei tama no reforma iha tinan-2026 iha Janeiru”, Anita Tavares dehan iha ámbitu selebrasaun loron nasionál saúde ba dala-10, iha Ponte BJ Habibie, Bidau Santana, ohin.
Nia esplika katak reforma nu’udar prosesu ida-ne’ebé atu halo modernizasaun ba estrutura, funsionamentu sira ba iha setór públiku nian, nune’e atu transforma administrasaun públika transparente ba nesesidade sosiedade nian.
“Reforma nu’udar prosesu modernizasaun ba estrutura no funsionamentu ba setór públiku ho objetivu atu transforma administrasaun públika sente liu transparente responde ba nesesidade sosiedade nian. Enjerál, buka atu otimiza jestaun rekursu umanu, mellora kualidade servisu no promove konfiansa sidadaun sira iha Estadu ida ne’e”, komisária ne’e dehan.
Notísia relevante: https://tatoli.tl/2025/06/02/reforma-obrigatoriu-hanesan-dalan-ida-prepara-foin-sae-sira/
Autoridade KFP ne’e afirma, ba Profisionál Saúde sira ne’ebé Komisaun Funsaun Públika atu halo reforma obrigatoriamente ne’e ba sira ne’ebé mak ba ona idade 65 ba leten. No, Komisaun Funsaun Públika rekoñese ba sira nia kontribuisaun ne’ebé sira halo ba iha setór saúde nian.
“Reforma obrigatoria ho idade-65 anos ne’ebé fiksa ona iha lei sai hanesan pasu hahú atividade reforma nia ho fiar katak ezekusaun ne’e tulun ida ita to’o ba objetivu sira ne’ebé ha’u mensiona. Komisaun Funsaun Públika rekoñese dedikasaun Profisionál Saúde sira hotu husi sira ne’ebé kleur liu no sira ne’ebé foin hahú ba imi nia kontribuisaun hodi exelente lori saúde ne’ebé besik ba ema hotu”, nia hateten.
Ba sira ne’ebé sei sai rekursu dahuluk ba iha reforma obrigatória, Komisária KFP ne’e dehan, nia aproveita momentu sira ne’e hotu hodi servi ho domin integridade nu’udar profisionál buka atu kuda nia aan ho vontade servi hodi fó atendimentu ida dignu no tane aas valór husi traballu estraordinaria ne’e.
Notísia relevante: https://tatoli.tl/2025/02/04/inss-hein-dadus-funsionariu-reformadu-husi-komisaun-funsaun-publika/
Jornaista : Felicidade Ximenes
Editór: Rafael Ximenes de A. Belo
