DILI, 28 Jullu 2025 (TATOLI)—-Ekipa Médiku Emerjénsia Portugés (PT EMT) husi Institutu Nasionál Emerjénsia Médika (INEM), domingu 27 Jullu 2025) ne’e, entrega ekipamentu primeru sukoru ba Servisu Nasionál Ambulánsia Emerjénsia (SNAEM, I.P).
“Ita apoiu ai-moruk no matéria ho tipu oioin ai-moruk sira-ne’e ba situasaun trauma, materiál sira-ne’ebé bele responde ba situasaun moras derrepente sira. Tanba, ita hatene katak insidénsia parte sira-nian iha servisu ambulánsia nian aas tebes, nune’e sira kaer númeru boot husi situasaun sira-ne’e,” Koordenadór PTMT husi INEM Portugal, Luis Ladeira, hateten ba Agência TATOLI, iha iha Kaikoli.
Hafoin entrega ai-moruk, sira mós koalia kona-ba kolaborasaun atu hadi’a kualidade servisu liuliu Servisu Nasionál Ambulánsia Emerjénsia liuhusi formasaun iha futuru.
“Ita kona-ba kolaborasaun ida-ne’ebé di’ak, karik sei akontese. Kolaborasaun entre Portugál no Timór sempre eziste, maibé iha termu Servisu Nasionál Ambulánsia Emerjénsia nian. Kolaborasaun ne’e, karik moris ohin, tanba ne’e buat ne’ebé ita hein mak bele kolabora no mós ajuda Servisu Nasionál Ambulánsia Emerjénsia atu dezenvolve iha futuru,” nia esplika.
Iha fatin hanesan, Diretór Servisu Nasionál Ambulánsia Emerjénsia Médika, Institutu Públiku (SNAEM, I.P), Simplício Amaral, hateten ekipa Institutu Nasionál Emerjénsia Médika (INEM) ne’ebe koerespondente ba jogo CPLP mai vizita SNAEM, I.P hodi haree direta kondisaun no entrega hela ai-moruk primeru sukoru nian.
“Iha Portugál ne’e, sira servisu hotu iha parte Ambulánsia Emerjénsia nia iha INEM, tanba ne’e mak sira aproveita oportunidade mai SNAEM hodi haree no fahe esperiénsia atu observa ita-nia situasaun. Ohin, sira apoiu médiku konsumaveis kaixa rua ba item esensiál sira,” nia dehan.
Nia hateten, medikamentu ne’ebe mak ekipa Portugál sira entrega mak hanesan ekipamentu kona-ba ekipamentu báziku ba SNAEM, I.P.
“Sira mós, ohin, fó mos ekipamentu báziku balun, bainhira pasiente iha ona koma. Ohin, sasán sira fo ne’e importante loos ba SNAEM,” nia hateten.
Nia dehan, karik iha posibilidade mak sira mós sei apoiu formasaun rekusu umanu, ekipamentu balun no transporte.
“Husi buat hirak ne’e laliu direta husi Portugál mós liu fali husi ajénsia balun ne’ebé mak Portugál kolabora ho sira mai apoiu SNAEM ba Ministériu Saúde,” nia dehan.
Jornalista : Felicidade Ximenes
Editór : Cancio Ximenes
