OEKUSI, 30 Jullu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejionál ba Asuntu Saúde, kuarta ne’e, hatuur fatuk-inan hodi konstrui rezidénsia ba pesoál saúde sira iha aldeia Mahata suku Lela-Ufe sub-rejiaun Nítibe.
Sekretáriu Rejionál ba Asuntu Saúde, Luís de Jesus Neno, informa, antes ne’e autoridade lokál sira preokupa tanba tinan barak ladún asesu ba fasilidade, nune’e polítika Autoridade RAEOA liuhusi serbisu Saúde Rejionál propoin iha PlanuAsaun Anuál (PAA) 2025 atu implementa iha tinan ne’e.
“Foin daudaun ne’e ita estabelese uluk fatin tratamentu suku, ita uza sede aldeia no eskola ne’ebé la uza, ita tau ai-moruk hodi fó atendimentu ba saúde ba inan-aman sira, ohin ita mai halo rezidénsia ba pesoál saúde sira, atu hela besik povu atu atendimentu saúde ho gratuitamente, depois planu ba futuru, fatin ne’e bele sai postu saúde ida, tanba fatin ne’e tinan barak ladún asesu fasilidade saúde ho distánsia besik,” Luís Neno, iha Oekusi, dehan.
Notísia relevante:Rezidénsia ba pesoál saúde Nítibe sei reabilita fali
Nia relata, bainhira komunidade sira aldeia Mahata suku Lela-Ufe, atu halo tratamentu saúde, obrigatóriu tenki la’o ain ho distánsia kilometru lima ba to’o postu saúde Bebo.
“Durante ne’e ita haree, sira enfrenta tebes ba atendimentu saúde, sira atu asesu ba fasilidade saúde exemplu ba postu saúde Bebo ho distánsia kilometru-lima, impaktu bo’ot ba ferik no katuas sira tanba moras tenke la’o ain ho distánsia do’ok, dalaruma sira-ne’ebé iha transporte bele ba, maibé sira-ne’ebé laiha, pasiénsia toba ho moras, tan ne’e Autoridade RAEOA liuhusi serbisu saúde, hakarak ka lakoi tenki hakbesik ba komunidade ne’ebé hela do’ok husi fasilidade saúde,” nia informa.
Notísia relevante:Abitante Naktuka rekomenda Autoridade RAEOA konstrui fasilidade saúde no eskola
Iha biban ne’e, Resprezentante Jestór sub-rejiaun Nítibe, Teodoru Sila, reprezenta komunidade sira hato’o sentimentu ksolok ba Governu tanba fasilidade saúde ne’e, sei responde ba suku tolu, mak suku Ban-Afi, Usitaku no Lela-Ufe rasik.
“Sente orgullu, tinan ne’e Governu aumenta tán fasilidade saúde iha postu Nítibe, ami espera ba oin bele nakfilak ba postu saúde, ami promete sei koopera tau matan hamutuk, nune’e obra ne’e bele finaliza tuir termu kontratu ne’ebé Autoridade RAEOA propoin ona,” nia orgullu.
Nia informa, sub-rejiaun Nítibe iha suku lima ho aldeia 17, daudaun ne’e iha sentru saúde ida lokaliza iha Baokanana, postu saúde lima no fatin tratmentu saúde iha tolu.
Notísia relevante:Saúde Oé-Cusse lansa vasina HPV iha Nítibe prevene kankru serviks
Entretantu, projetu ne’e ezekuta husi kompañia lokál Zenizeva Unipesoál Lda, ho valór orsamentu $56,420.39 ho durasaun tempu fulan neen.
Jornalista: Abílio Elo Nini
Editór: Rafael Ximenes de A. Belo
