BAUKAU, 04 Agostu 2025 (TATOLI) — Prokuradór Jerál Repúblika, Nelson de Carvalho hateten, Konsellu Superiór Majistratura Ministeriu Públiku diskute ona pesoál autoridade judisiáriu Ministeriu Públiku nian ne’ebé suspeitadu envolve iha krime asédiu seksuál.
Nia dehan, Konsellu Superiór Majistratura Ministériu Públiku halo ona reuniaun hodi haree ba situasaun ne’ebé akontese virál tebes iha facebook.
“Agora ita-boot sira hakarak konsellu foti ne’e ba sasaun, prontu tuir buat-ne’ebé nia komete prontu sei tuir nia prosesu, Konsellu Superiór Majistratura Judisiária sei toma deliberasaun hodi fó sansaun,” Nelson informa ba Tatoli hafoin partisipa semináriu nasionál loron ida ne’ebé organiza husi Vise-Ministru Fortalesimentu Instituisionál, Paulo Remedios ho tema “Educação Civica de Divulgação do Sistema Justica” iha otel Benfica, Baukau segunda, ohin.
Nia dehan, automátikamente pesoál autoridade judisiáriu ne’e sei hetan asaun ba buat-ne’ebé nia halo.
“Klaru ke sansaun ne’e tenke ser iha, sansaun ne’e sempre iha. Ha’u labele dehan bele ou labele maibé sansaun disipliñar sempre iha,” nia informa.
Nia hatutuan, durante ne’e estatutu Ministériu Públiku mak la permite atu Majistratura Judisiária ida ko’alia iha publiku liga ho asuntu ne’e.
“Ha’u bele ko’alia hanesan Prokuradór Jerál no Prezidente ba Konsellu Superior Majistratura Ministeriu Públiku nian tanba durante ne’e iha mundu tomak Prokuradór no Juiz sira nunka halo komentáriu, sa tán konferensia imprensa,” nia esplika.
Nelson konsidera katak opiniaun ne’ebé mak Sosiedade Sivíl hanesan Rede Feto no Fokupers hato’o ne’e atu hafanun Ministériu Públiku.
Prokuradór Jerál Repúblika Nelson de Carvalho seidauk hatene momentu Majistratura Judisiáriu uza karreta Estadu mak halo asaun asédiu seksuál ne’e.
“Ha’u laiha koñesimentu, prontu ha’u rona ema dehan nia uza karreta Estadu. Sé ida-ne’e iha mak prosesu investigasaun, husi investigasaun mak ita bele deklara katak karreta ne’e Estadu nian ka, karreta privadu nian ou kareta aluger ruma ou empresta kolega nian,” nia konklui.
Notísia relevante: PDHJ triste autór judisiariu balun suspeitu envolve krime asediu sesúal
Jornalista: Natalino Costa
Editór: Evaristo Soares Martins
