VIKEKE, 05 Agostu 2025 (TATOLI)—Autoridade Postu Uatulari, Munisípiu Vikeke solisita Komandante Jerál (Komjer) Polísia Nasionál Timor-Leste (PNTL), Henrique da Costa kontrola membru PNTL sira atu labele uza arma hodi tiru populasaun sira-nia karau.
Xefe Suku Matahoi, Postu Uatulari, António Amaral hateten populasaun Uatulari ninia karau ne’ebé husik iha área Lugasa, Suku Uma-Ua’in Leten, Postu Vikeke Vila, dalabarak arma sempre tarutu iha área ne’ebá (fatin ne’ebé husik karau), maibé lahatene loos arma ne’e maihusi ne’ebé.
“Tanba ne’e, ha’u hakarak husu ba Komandante Jerál PNTL esplika ba membru sira no FALINTIL-Forsa Defeza Timor-Leste (F-FDTL) atu labele uza arma ba tiru fali populasaun sira-nia animál ne’ebé husik iha Lugasa,” António Amaral hateten iha Suku Makadike de Cima, Postu Uatulari, Tersa ne’e.
Autoridade ne’e subliña kultura Uatulari mak ema na’ok karau ida selu karau sanulu (10) bazeia ba desizasaun kultura nian.
Hatán ba preokupasan ne’e, Komandante Jerál Polísia Nasionál Timor-Leste (PNTL), Henrique da Costa informa katak preokupasaun autoridade sira kona-ba membru uza arma oho populasaun sira-nia animál, kuandu autoridade sira hetan tenke selu fila populasaun sira-nia animál.
“Ha’u gosta autoridade sira-nia regra karau ida selu karau sanulu. Ha’u mós konkorda ida-ne’e. Se bele selu to’o karau 20 mós di’ak, tanba kilat ne’ebé ami uza ne’e la’ós ba tiru populasaun animál. Nune’e, sé mak halo atu sira-ne’e sei responsabiliza no parte PNTL sei foti medida ba atu sira-ne’e,” nia realsa.
Jornalista: Vitorino Lopez da Costa
Editór: Xisto Freitas da Piedade
