DILI, 13 Agostu 2025 (TATOLI)—Diretór Servisu Saúde Munisípiu Baucau (SSMB), Cristiano Cipriano Belo, informa hahú husi Janeiru to’o Juñu 2025 ne’e bebé ne’ebé mate iha inan nia kabun laran hamutuk na’in-ualu (8) iha sentru Saude Munisípiu Baucau (SSMB).
“Janeiru-Juñu taxa mortalidade inan zero (laiha) maibé iha taxa mortalidade bebé ne’ebé mate iha inan nia kabun laran iha na’in-ualu (8),” Diretor Servisu Saúde Munisípiu Baucau (SSMB), Cristiano Cipriano Belo, hateten ba jornalista sira iha Hotel Palm Spring, Fatuhada, ohin.
Nia dehan, taxa mortalidade bebé na’in-ualu ne’e husi sentru saude sira-ne’ebé inklui husi postu saúde 30 iha Baucau.
“Bebé ne’ebé mate iha inan nia kabun laran ne’e husi sentru saude inklui postu saúde 30, ne’ebé ita rejistu, la’ós husi ospsitál referal Baucau sira-nia dadus ne’e ketak,” nia dehan.
Nia informa, taxa mortalidade bebé ne’e ladun aas, tanba profisionál saúde sira iha sentru saúde nomós postu saúde sira-ne’e treinadu hotu.
Iha fatin hanesan, Prezidente Autoridade Munisipiu Baucau (PAM-Baucau), Veneranda Lemos Martins, esplika katak informasaun ne’e loos tanba servisu pesoál saúde sira nakonu ho responsabilidade.
“Taxa mortalidade inan zero, atu dehan katak ita-nia pesoál saúde ho diak teb-tebes,” nia dehan.
Jornalista : Felicidade Ximenes
Editór : Cancio Ximenes
