DILI, 15 Agostu 2025 (TATOLI)—Populasaun Ainaru preparadu no prontu simu implementasaun poder lokál no desentralizasaun administrativa, tanba ne’e, Administrasaun munisipál prepara hela kondisaun hodi hakat ba oin.
“Ainaru prontu simu desentralizasaun no atu dehan kompromisu komunidade Ainaru prontu simu. Agora kondisaun saida mak Autoridade tenke prepara, ida-ne’e mak ita halo atu hadi’a. Ita prepara rekursu umanu, ita tenke esplora poténsia Ainaru nian, nune’e bele lori fonte rendimentu ba munisípiu rasik,” Prezidente Autoridade munisípiu Ainaru, Manuela Georgina Carmo Bucar Corte Real, informa ba Ajénsia TATOLI, iha Ministériu Finansa (MF), Aitarak-laran, Sesta ne’e.
Nia dehan, Administrasaun Ainaru ba dahuluk sei ko’alia kona-ba forsa traballu, ne’ebé munisípiu ne’e laiha problema tanba hakarak hola parte iha programa desentralizasaun administrativa.
“Ita haree Ainaru iha poténsia boot, oinsá mak dezenvolve poténsia sira ne’e ba fonte rendimentu. Tanba ita haree loja agrikultura iha kafé, pekuária no turizmu iha mós barak. Agora oinsá dezenvolve no esplora poténsia,” nia akresenta.
Notísia relevante : Autoridade Ainaru propoin repoen fali orsamentu tinan 2025 ba tinan oin
Aleinde ne’e, tinan oin parte nasionál sei ba halo avaliasaun ba kondisaun mínima Ainaru nian.
“Espera katak Ainaru bele prense rekezitu nune’e bele avansa ba desentralizasaun,” nia katak.
Munsípiu Ainaru ho nia poténsia mak hanesan área agrikultura, ortikultura, floresta, no turizmu komunitáriu, área ortikultura ne’ebé lokaliza iha postu adminstrativu Maubisse no postu adminstrativu Hato-Builiku. Área Agrikultura lokaliza iha postu administrativu Hato-Udo no postu administrativou Ainaru. Área floresta kafé lokaliza iha postu administrativu Maubisse, Hato-Builiku no postu administrativu Ainaru.
Iha munsípiu Ainaru iha mós ai-kameli, kamí, nuu, aiteka, baunila, ai-mahoni, no ai-gaharu, ne’ebé barak liu maka iha postu administrativu Hato-udu, Pecoaarea maiória iha postu Hato-udu no iha postu tolu seluk menus husi postu administrativu Hato-udu.
Munsípiu Ainaru iha postu administrativu haat, suku 21 no aldeia 131 mak hanesan postu Ainaru ho suku hitu aldeia 32, postu Maubisse ho suku sia aldeia 62, postu Ato-Builiku ho suku tolu aldeia 21 no postu Hato-Udu ho suku rua aldeia 16.
Iha xefe família hamutuk 17.848 no abitante iha munisípiu Ainaru hamutuk 81.713, kompostu hosi mane iha 41.557, feto iha 40.156.
Jornalista : Osória Marques
Editora : Julia Chatarina
