VIKEKE, 20 Agostu 2025 (TATOLI)–Prezidente Konsellu Kombatente Libertasaun Nasionál (CCLN-sigla portugeza), Adriano da Câmara ‘Lentil’ hateten Forsa Armada Libertasaun Nasionál Timor-Leste (FALINTIL) ninia misaun mak liberta povu no nasaun tanba FALINTIL mak sai liman-ko’at povu maubere.
“FALINTIL ninia misaun todan tebetebes. FALINTIL ninia misaun mak hakarak funu hodi liberta ita-nia povu no nasaun. FALINTIL mak liman-kro’at povu maubere nian. Nune’e mós FALINTIL brasu diretu FRETILIN nian tanba tuir prosesu funu, durante tinan tolu iha baze apoiu FALINTIL sai forsa FRETILIN,” Lentil ba TATOLI iha Vikeke Vila, Kuarta ne’e.
Notísia relevante: Governu aprova projetu rezolusaun ba komemorasaun aniversáriu FALINTIL da-50
Nia relembra FALINTIL iha ai-laran hela uitoan tanba barak mak rende hodi fila bá vila, maibé iha Ponta-Leste FALINTIL sei barak nune’e mosu loron 3 Marsu 1981 re-organiza rezisténsia funu nian.
Nia haktuir Komandante ein-Xefe FALINTIL, Kay Rala Xanana Gusmão mak re-organiza FALINTIL tanba iha momentu ne’ebá FALINTIL sai izoldu ona no banhira re-organiza FALINTIL ho polítika ida unidade nasionál hodi halibur povu tomak inklui Igreja Katólika.
“Ho polítika unidade nasionál ne’e mak foin ita-nia Igreja Katólika apoiu másimu ba ita-nia luta libertasaun. FALINTIL ninia reponsablidade mak funu, sakrifísiu, sofre no balun mate ba rai ida-ne’e hodi atinje objetivu ba ukun-rasik aan,” nia konta.
Jornalista: Vitorino Lopez da Costa
Editór: Xisto Freitas da Piedade
