DILI, 22 Agostu 2025 (TATOLI)-Prokuradór Jerál Repúblika, Nelson de Carvalho, hateten Ministériu Públiku (MP) rejista ona keixa ne’ebé aprezenta husi Sekretáriu Estadu Formasaun Profisionál Empregu (SEFOPE), Rogeiro Mendonça, no Prezidente Autoridade Munisipiu (PAM) Aileu, João Bosco dos Santos.
Nia dehan, prokuradór titulár ba prosesu haree hela keixa ne’e. “Prosesu sira ne’e, sé ita-boot sira hatene ona konaba ida-ne’e, klaru-ke rejista ona iha Ministériu Públiku, agora daudaun prokuradór ne’ebé titulár ba ida-ne’e haree, obrigadu”. Nelson hatán ho badak ba jornalista sira hafoin aprezenta orsamentu adisionál Prokuradoria Jerál Repúblika ba tinan-oin iha Ministériu Finansa, sesta-ne’e.
Rekorda fali, kuarta (18/6/2025) liubá Sekretáriu Estadu Formasaun Profisionál Empregu (SEFOPE), Rogério Araújo Mendonça, hato’o keixa hasoru Komisáriu Adjuntu Komisaun Anti Korrupsaun, Miguel Acacio Faria, ba Ministériu Públiku, tanba lamenta ho nia deklarasaun iha públiku katak kauza Governante ne’e foti subar osan Estadu.
Notísia relevante: Sekretáriu Estadu Rogério keixa Adjuntu Komisáriu CAC ba MP
Enkuantu Prezidente Autoridade Munisipiu Aileu, João Bosco dos Santos, iha loron tersa (10/6/2025) aprezenta keixa ba Ministériu Públiku hasoru Komisaun Anti Korrupasaun tanba lamenta ho sira nian buka no apreensaun ne’ebé halo iha Gabinete PAM Aileu, no konsidera la tuir enkuadramentu legál.
Notísia relevante: PAM Aileu aprezenta keixa ba Ministériu Públiku kontesta atuasaun CAC
Jornalista : Natalino Costa
Editora : Rita Almeida
