DILI, 23 Agostu 2025 (TATOLI) – Amu-Bispu Arkidioseze Metropolitana Dili, Don Virgílio Kardeál do Carmo da Silva, hatete prezensa Krús Peregrina no íkonu Na’i-Feto Salus Populi Romani nian iha Timor-Leste konstitui momentu bensaun no grasa nian ba povu timoroan, liuliu ba foinsa’e katólika, labarik no katuas-ferik sira.
“Krús mak ita-nia esperansa”, Don Virgílio Kardeál hatete durante serimónia ne’ebé hala’o iha Igreja Katedrál Imakulada Conceição Dili, sábadu ne’e.
Kardeál Virgílio hatutan katak ida-ne’e ba dala rua Timor-Leste simu, ne’ebé ho símbolu sira fiar katólika nian ne’e, hafoin vizita dahuluk iha tinan 2008, bainhira Krús Peregrinu iha Austrália.
Nia subliña iha ninia prezensa iha kontinente aziátiku hanesan konvite ida atu hametin fiar husi sarani katólika sira iha rejiaun ne’e.
“Loron Mundiál Juventude 2027 sei hala’o iha Koreia-Súl, no molok enkontru boot ne’e, Krús Peregrinu sei hala’o viajen iha Ázia tomak ba tinan rua oinmai. Ninia pasajen hanesan sinál ida esperansa no unidade nian, hodi nune’e joven katóliku kontinente nian, maske minoria, bele forte no reziliente”, nia dehan.
Don Virgílio Kardeál akresenta maske iha relijioza oioin, maibé povu Ázia kontinua buka Maromak no moris sira-nia fiar ho esperansa foun.
Tuir ajenda Komisaun Nasionál Juventude Katólika, krús ne’e mai husi Korea Súl no sei hela iha Timor-Leste to’o loron 30. Hafoin nia to’o, transporta ba Katedrál Dili, iha-ne’ebé hala’o vijília kalan tomak, ho momentu espozisaun no promosaun vokasaun nian. Aban, sei iha selebrasaun solene iha fatin hanesan.
Iha loron 25, sei lori Krús iha peregrinasaun ba Dioseze Maliana, iha Bobonaro, iha ne’ebé sei iha misa iha Katedrál Maliana no vijília. Iha loron tuir mai, sei lori ba Parókia Bobonaro, hodi marka abertura ofisiál Loron Nasionál Juventude nian ho selebrasaun Eukarístika espesiál.
Loron 27 sei dedika ba formasaun no espiritualidade, ho palestra ida ho tema “Ha’u Hamrook”, aprezentasaun ida hosi delegasaun súl-koreanu responsável ba Krús Peregrinu nian, no momentu sira katekeze nian, orasaun nian, no sakramentu konfisaun nian. Iha loron tuir mai, eventu karidade ida no konsertu ida sei akontese iha Bobonaro.
Iha loron 29, sei entrega krús ba sarani sira iha postu administrativu Remexio iha Aileu ho selebrasaun Misa molok fila mai Dili. Serimónia enserramentu ofisiál sei hala’o iha loron 30 fulan Agostu ho misa solene iha Katedrál Díli, hafoin sei haruka krús ba Tailándia, nasaun peregrinasaun tuirmai.
Jornalista : Osória Marques
Editór: Florencio Miranda Ximenes
