BOBONARU, 25 Agostu 2025 (TATOLI)—Segunda kalan ne’e, sarani sira kompostu hosi ferik-katuas, foinsa’e no labarik sira halo venerasaun ho símbolu rei Krús Joven Internasionál no Íkonu Na’in-Feto Salus Papuli Romani ho entusiazmu hodi husu bensaun no grasa liuhusi orasaun atubele kasu sala tomak.
Iha omília, Bispu Dioseze Maliana, Dom Norberto do Amaral konsidera venerasaun ne’e nu’udár grasa ida tanba Krús ne’e nu’udár illas ida-ne’ebé Jezús tara-aan ba halo sakrifísiu hodi kasu mundu nia sala no soi ema hotu-hotu husi sala no aat tomak liuhusi mate hodi ba moris ne’ebé di’ak nian.
“Krús ne’ebé Jezús tara-aan ba, nia loke nia hirus-matan nakloke. Nia hatudu nia fuan ne’e la’ós hatudu de’it, maibé husi Krús nia tutun nia loke nia hirus-matan ida-ne’e hodi sulin mai ita bee kahur ho raan. Bee ne’e reprezenta batizmu. Raan ne’e sakramentu eukaristia. Bee ne’e fase ita-nia sala sira hotu. Eukaristia habosu ita, fó kbi’it mai ita atu ita bele lori moris di’ak mundu ida-ne’e hodi lori di’ak ita nia-aan tuir Maromak nia hakarak. Husi ne’e Kreda ne’e moris ho Jezús nia raan no bee sulin iha Krús ida-ne’e nia tutun,” Dom Norberto haklaken.
Notísia relevante: Dioseze Maliana simu Krús Joven Internasionál ho serimónia kulturál
Prezidente Konferénsia Episkopál Timorense ne’e husu sarani sira harohan ba Maromak atu husi Krús Joven Internasionál ne’e bele hetan kbiit foun hodi kaer didi’ak kna’ar no hodi moris di’ak nu’udár sarani loloos nune’e bele sai didi’ak Maromak nia oan.
Entretantu, Prezidente Ezekutivu Komisaun Nasionál Juventude Katólika Timor-Leste no Koordenadór Ekipa Sinodal ba vizitasaun Krús Internasionál, Pe. Francisco Indra reforsa vizita Krús Santa hanesan momentu ida-ne’ebé ema hotu asiste prezensa reál Jezús Kristu nian.
“Biban ida-ne’e ita hotu haksolok tanba marka tan istória iha uma-kreda ein-partikulár Dioseze Maliana,” nia subliña.
Enkuantu, selebrasaun misa ne’e hetan seguransa másima husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).
Tuir ajenda, ohin (26/08) sei realiza misa iha Pro-Katedrál Maliana no hafoin ne’e sei kontinua prosesaun husi Maliana ba Igreja Bobonaru no halo abertura misa Jornada Nasionál Juventude no sei hela iha Postu Administrativu Bobonaru to’o loron 29 Agostu.
Jornalista: Sergio da Cruz
Editór: Xisto Freitas da Piedade
