DILI, 26 Agostu 2025 (TATOLI)—Autoridade Suku Buruma, Postu Administrativu Baukau Vila, Munisípiu Baukau solisita Ministériu Turizmu no Ambientál (MTA) atu aselera inaugurasaun projetu komunitáriu ne’ebé hala’o iha Wataboo, Aldeia Tasi.
Xefe Suku Buruma, Postu Administrativu Baukau Vila, Libório dos Santos Freitas esplika turizmu komunitáriu ne’e ligadu ho reabilitasaun Uma Portugés iha área tasi-ibun Wataboo ne’ebé hala’o husi MTA, nune’e mezmu autoridade laiha informasaun maibé presiza aselera no define ona jerente para tau-matan iha futuru.
“Ami rekomenda de’it katak kuandu finaliza ona presiza iha termu entrega no delega responsavel ida atu tau-matan iha futuru nune’e labele abandonadu,” Xefe Suku Buruma informa ba TATOLI liuhosi telefónema, Tersa ne’e.
Libório relata husi informasaun no observasaun direta iha terrenu nota projetu referidu finaliza ona maibé to’o to’o seidauk iha informasaun kona-ba inaugurasaun no termu entrega ruma ba institusaun inklui autoridade suku hodi jere iha fururu.
Projetu referidu tipu turizmu komunitáriu iha-ne’ebé finansia husi MTA, ne’ebé kompañia Vinte de Maio Unipessoal, Lda mak responsabiliza no tuir kontratu hahú implementa iha Agostu 2024 to’o Fevereiru 2025.
Tuir kontratu, projetu ne’e halo reabilitasaun ba Uma Portugál, konstrusaun foun ba gazebo no toilet ho totál orsamentu hamutuk rihun $57-resin.
Jornalista: Natalino Belo
Editór: Xisto Freitas da Piedade
