DILI, 28 Agostu 2025 (TATOLI) – Primeiru-Ministru, Xanana Gusmão, inaugura ohin instalasaun foun Bank Rakyat Indonesia (BRI) iha Kolmera, Dili, no husu ba instituisaun bankária ne’e atu hala’o papél ativu hodi promove dezenvolvimentu ekonómiku, ho foku ba joven timoroan sira.
Iha inaugurasaun ne’e, Primeiru-Ministru apresia ho BRI nia kompromisu kontínua hodi apoia dezenvolvimentu ekonómiku nasionál. Tuir nia, dezafiu boot liu ohin loron mak kria postu traballu ba joven sira, maski populasaun Timor-Leste (TL) liu pursentu 35 ho idade maioria tinan 25 mai kraik.
“Ita tenke fó oportunidade ba joven sira, nune’e sira bele deskobre sira-nia talentu, dezenvolve sira-nia potensiál no serbisu”, Xanana Gusmão hateten.
Xefe Ezekutivu ne’e mós relata katak Governu iha planu atu estabelese Banku Nasionál Dezenvolvimentu Timor-Leste ho objetivu atu fo empréstimu ho funan ki’ik ba joven no empreza ki’ik no médiu sira. Inisiativa ne’e la’ós atu kompete ho banku sira seluk, maibé atu fó pontu partida ida ba joven sira atu hahú negósiu.
“Ami hakarak garante katak kreximentu ekonómiku la para iha tranzasaun ki’ik sira, la depende de’it ba importasaun sira, maibé hametin duni fundasaun husi dezenvolvimentu nasaun ida-ne’e nian”, nia hatutan.
Iha biban ne’e, Xanana mós hato’o nia agradesimentu ba BRI ne’ebé durante tinan ualu ona eziste iha Timor-Leste. “Maski viajen ne’e dezafiante, maibé BRI nia prezensa hanesan parseiru importante ba ami. Hein katak, kolaborasaun ne’e sei buras nafatin, no povu Timor-Leste ho BRI nia prezensa”, realsa.
Iha fatin hanesan, Embaixadór Indonézia iha Timor-Leste, Okto Dorinus Manik, dehan BRI nia prezensa nu’udar evidénsia konkreta ba kompromisu Indonézia nian atu kontinua fó apoiu ba dezenvolvimentu ekonómiku Timor-Leste nian.
“BRI nia prezensa hanesan demonstrasaun klara ida kona-ba kompromisu Indonézia nian hodi apoia dezenvolvimentu ekonómiku iha nasaun belun ida-ne’e. Ami apresia tebes katak maioria pesoál BRI nian iha Timor-Leste ema timoroan. Ida-ne’e hanesan forma investimentu ida ne’ebé tanjivel ba longu prazu”, nia hateten.
Director Treasury and International Banking BRI, Farida Thamrin, haktuir viajen BRI nian hahú iha Timor-Leste iha tinan 2017. BRI harii uluk ho fatin simples ida de’it, maibé agora habelar ona instalasaun ne’e.
“Iha tempu ne’ebá, ami hahú atende ho fatin ki’ik ida ne’ebé simples, tanba konfiansa públiku no apoiu husi parte oioin to’o tinan 2025 ami habelar ona husi ida-ne’e ba espasu haat. Ne’e hanesan realizasaun ida ne’ebé orgullu tebes ba ami”, nia hato’o.
Farida hatutan atu hadi’a konveniénsia, BRI hadi’a ona ninia ATM, introdús servisu bankáriu prioridade, no loke sukursál móvel rua iha Oekusi no Baukau hodi habelar nia servisu bankáriu ba komunidade ne’ebé luan liu.
“Ami sente orgullu katak aioria hosiu funsionáriu sira BRI Timor-Leste nian maka joven lokál sira, tantu mane no feto sira, nakonu ho enerjia no entuziasmu. Ami iha kompromisu hodi hakbiit nafatin talentu lokál sira, tanba ami fiar katak dezenvolvimentu ekonómiku tenki la’o hamutuk ho dezenvolvimentu rekursu umanu sira”, nia subliña.
Nia konklui hodi hato’o agradesimentu ba Governu Timor-Leste, autoridade bankária sira, no parseiru sira hotu ne’ebé fó apoiu ba BRI nia dezenvolvimentu.
Jornalista: Arminda Fonseca
Editora: Maria Auxiliadora
