VIKEKE, 28 Agostu 2025 (TATOLI)—Xefe Suku Ahik, Postu Administrativu Lakluta, Munisipiu Vikeke, Ercilio Soares hateten eletrisidade iha Suku Ahik funsiona hikas ona hafoin avaria kuaze fulan ida resin.
“Ami-nia eletrisidade avaria kuaze fulan ida resin. EDTL husi munisípiu mak mai halo manutensaun ne’ebé agora eletrisidade lakan fali ona besik semana ida,” Ercilio Soares hateten ba TATOLI iha Postu Lakluta, Kinta ne’e.
Autoridade ne’e rekomenda ba EDTL, E.P. no empreza responsavel tenke fó-atensaun ba eletrisidade ne’ebé liga mai suku rurál, nune’e bainhira avaria ruma bele hetan manutensaun lalais.
“Ami rekomenda ba parte empreza responsavel ligadu ho projetu eletrifikasaun tanba projetu referidu seidauk konklui 100%, nune’e tenke tau-atensaun nafatin, atu avaria ruma halo manutensaun lalais. Labele lori fali fulan mak foin mai halo manutensaun,” nia hato’o.
Notísia relevante: Ekipa EDTL, E.P Vikeke halo ona manutesaun eletrisidade iha suku Ahic no Laline
Nia fó-hanoin fali katak iha tinan 2024 eletrisidade ligasaun ba suku referidu avaria kuaze fulan haat no iha tinan 2025 avaria fulan ida resin mak EDTL sira halo manutensaun.
Projetu eletrifikasaun iha suku referidu hahú iha tinan 2022 no 2023. Projetu ne’e responsabiliza husi Empreza Uaitau Unip, Lda no Empreza Carnesia Unip, Lda. Tuir dadus, Suku Ahik iha uma-kain 450 mak asesu eletrisidade.
Jornalista: Vitorino Lopez da Costa
Editór: Xisto Freitas da Piedade
