DILI, 02 Setembru 2025 (TATOLI) – Deputadu CNRT, Natalino dos Santos, kontinua ezije ba Governu atu koordena ho Indonézia hodi buka tuir Nicolau Lobato nia ruin, ne’ebé to’o ohin loron seidauk hetan.
Nia husu entidade sira hanesan Prezidénsia Repúblika, liuliu Ezekutivu atu halo komunikasaun ho país viziñu hodi identifika Nicolau Lobato nia ruin hodi haloot iha fatin dignu, tanba Timor-Leste no Indonézia promove polítika rekonsiliasaun.
“Nune’e, ita bele haloot tuir ita-nia kultura, iha fatin dignu hodi fó onra”, nia hato’o iha Parlamentu, ohin.
Iha sorin seluk, deputadu FRETILIN, David Dias Ximenes ‘Mandati’, solisita ba Governu tenke tau atensaun ba kestaun ne’e no labele husik tempu naruk hodi ko’alia ho nasaun viziña sobre asuntu ne’e.
Antes ne’e mós Prezidente Repúblika, José Ramos-Horta, promete sei halo esforsu hodi ko’alia ho nia omólogu Indonézia, Prabowo Subianto, hodi buka tuir paradeiru restu mortál Primeiru-Ministru no Segundu Xefe Estadu, Nicolau Lobato, ne’ebé mate iha área Binani, suku Mindelo, postu administrativu Turiskai, munisípiu Manufahi, iha loron 31 Dezembru 1978.
Notísia relevante: https://tatoli.tl/2025/08/16/pr-sei-koalia-ho-prabowo-subianto-hodi-buka-nicolau-lobato-nia-ruin/
Jornalista: Nelson de Sousa
Editora: Maria Auxiliadora
