KOVALIMA, 03 Setembru 2025 (TATOLI) – Autoridade Kovalima ne’ebé lidera husi Prezidente Munisípiu Kovalima ho nia estrutura hamutuk ho sarani sira hala’o prosisaun hodi komemora loron Masakre Setembru Negro 1999 ba dala-26.
Rute prosisaun ne’e, hahú husi Aeroportu Kay Rala Xanana Gusmão to’o iha monumentu Masakre Setembru Negro 1999 .
“Prosisaun ne’e hanesan sakrifisiu ba eroi sira ne’ebé dedika nia aan hodi sosa independénsia liuliu ba saudozu padre na’in-tolu hamutuk sarani sira hamutuk 134 mak mate iha loron 6 Setembru 1999”, Prezidente Autoridade munisípiu Kovalima, Miguel Armada Cardoso, dehan ba jornalista, iha monumentu Masakre Setembru Negro, Kovalima, ohin.
Biban ne’e, PAM ne’e husu ba Kovalima-oan atu fó onra nafatin ba martir no eroi sira tanba sira nia berani ba mate mak Timor-Leste hetan ukun rasik aan.
“Ha’u observa komunidade sira seidauk iha konsénsia nune’e ladun partisipa másimu tanba seidauk hatudu loloos katak loron 6 Setembru 1999 presiza fó importánsia tanba ne’e tau masakre Setembru Negro 1999 eroi lubuk ida mak hakotu sira-nia vida hodi sosa independénsia,” nia lamenta.
Iha fatin hanesan, Padre Pároku Ave Maria Suai, Aderito da Costa Morreira, reforsa programa prosesaun ne’e parte ida atu fó hanoin ba jerasaun foun sira tanba Timor nia ukun rasik-aan ne’e sosa ho ran no ruin.
“Intensaun hala’o prosesaun ne’e hanesan parte ida atu fanu jerasaun foun sira ita-nia ukun rasik aan la’os ita sosa maibé ho ema barak nia sakrifisiu liuliu padre na’in tolu ho sarani sira sosa ho sira nia ruin no ran” , deahn Amo ne’e.
Notisia relevante: Autoridade Covalima kari ai-funan iha monumentu Masakre Setembru Negro 1999
Jornalista: Celestina Teles
Editór: Florencio Miranda Ximenes
