COVALIMA, 12 Novembru 2024 (TATOLI) –Autoridade Munisípiu Covalima tau ai-funan no sunu lilin iha monumentu Masakre Setembru Negro 1999 hodi komemora Loron Nasionál Juventude no Masakre Santa Krús, iha 12 Novembru 1991.
Sekretáriu Munisipál Administrasaun no Finansa, Alberto Moniz de Araújo, hateten komemorasaun loron ne’e tanba juventude loriku asu’ain sakrifika sira-nia aan ba independénsia Timor-Leste.
“Ita halo prosesaun lori ai-funan husi Igreja Ave Maria Suai mai iha monumentu Masakre Setembru Negro 1999 ho nia sentidu ita hatudu ita-nia nasionalizmu no patriotizmu ba erói, liuliu ba joven loriku asu’ain sira. Ita sira-ne’ebé sei moris presiza atu kontinua joventude sira-nia obra hodi bele dignifika no valoriza liuhusi komemorasaun loron nasionál”, Alberto Moniz dehan iha ámbitu kari ai-funan, ohin.
Ho selebrasaun loron nasionál 12 Novembru ida-ne’e, joven-sira agora presiza hatutan dezenvolvimentu, tanba joventude loriku asu’ain sikrifika sira-nia aan hodi buka liberdade.
Alberto Moniz husu joven-sira banati tuir joven sira uluk ne’ebé dedika sira-nia aan hodi luta ba ukun rasik-aan. Tanba ne’e, joven sira presiza kuidadu aan no estuda hodi bele troka juventude loriku asu’ain.
Iha sorin seluk, estudante UNTL Francisco Perreira, orgullu partisipa iha komemorasaun loron nasionál 12 Novembru, ne’ebé hanesan parte ida-l atu lembra hikas joven sira-nia sakrifísiu to’o Timor-Leste bele hetan nia independénsia.
“Uuk ita-nia juventude loriku asu’ain sira luta ba ukun rasik-aan atu hetan independénsia nune’e ohin loron ita bele goza. Joven [agora] presiza atu kontribui ba kualkér dezenvolvimentu, presiza estuda tanba liuhusi edukasaun mak bele kontinua luta juventude loriku sira-nia sakrifísiu”, dehan.
Tuir observsaun jornalista Tatoli, komemorasaun Loron Nasionál Juventude ba da-33 autoridade lokál sira-nia prezensa ladún masimu kompara ho tinan sira seluk.
Notísia relevante: Sobrevivente 12 Novembru partilla istória Masakre Santa Krús ba alunu sekundáriu sira
Jornalista: Celestina Teles
Editora: Maria Auxiliadora
