MANUFAHI, 06 Setembru 2025 (TATOLI) – Governu liuhusi Ministériu Obra Públika (MOP) iha tempu-badak sei lansa projetu konstrusaun estrada husi Luak ba Betanu iha postu-administrativu Same, munisípiu Manufahi ho distánsia kilómetru 10.
Nune’e, Ministru Obra Públika Samuel Marçal, dehan ohin hala’o observasaun iha terrenu hodi haree kondisaun estrada no preparasaun empreza nian atu implementa projetu referidu hodi bele garante kualidade tanba gasta osan ho montante boot.
Governante ne’e adianta, obra ne’e sei lansa direita husi Primeiru Ministru (PM), Kay Rala Xanana Gusmão.
“Sei (lansa) iha semana oin, maibé depende ba Primeiru-Ministru nia tempu”, nia informa ba jornalista sira iha fatin observasaun, Luak-Same, sábadu ne’e.
Autoridade governativa ne’e dehan, observasaun ne’e haree kurije mós dezeñu ne’ebé iha ona hodi garante implementasaun ho kualidade.
Ministru Samuel Marçal, espera obra ne’e bainhira implementa finaliza tuir tempu ne’ebé iha tanba agora tempu bailoron.
“Espera konstrusaun estrada no drainajen ne’e , bele la’o ho di’ak no finaliza, tanba ida-ne’e ita reabilita estrada ku’ak sira halo kaber”, nia espera.
Projetu konstrusaun ne’e fahe ba pakote rua, kada ida kilómetru lima (5), ho orsamentu ba pakote ida miliaun $4 no pakote seluk miliaun $3, nune’e hamutuk milliaun $7, projetu referidu ho durasaun kontratu tinan ida ho balun ne’ebé responsabiliza husi empreza Starking.
Jornalista: Alexandra da Costa
Editór: Rafael Ximenes de A. Belo
