VIKEKE, 09 Setembru 2025 (TATOLI)—Xefe Suku Uma-Tolu, Postu Administrativu Lakluta, Munisípiu Vikeke, Eduardo Soares informa Programa Nasionál ba Dezenvolvimentu Suku (PNDS) implementa sistema melloramentu bee-moos ba uma-kain 123 iha Aldeia Aisuco-Nuc ne’ebé durante ne’e enfrenta difikuldade ba bee-moos.
“Komunidade parte Aldeia Aisuco-Nuc husi Suku Uma-Tolu iha tinan 2022 asesu ba bee-moos, maibé bomba aat tiha, nune’e komunidade labele asesu ba bee-moos. Iha tinan 2025, PNDS monu iha Aldeia Aisuco-Nuc, entaun komunidade enkontru iha aldeia hodi deside programa prioridade tolu hodi propoin ba suku. Husi programa tolu ne’e kompostu husi sanitária, loke dalan no dada bee-moos,” Eduardo Soares ba TATOLI iha Suku Uma Tolu, Tersa ne’e.
Husi programa tolu ne’e, nia haktuir, komunidade sente katak bee-moos mak sai hanesan perioridade liu nune’e deside mak bee-moos.
Autoridade suku ne’e haktuir sistema melloramentu bee-moos ne’e atinje ona 35%, iha-ne’ebé konstrui ona tanke rezervatóriu ida no sei kontinua kanaliza bee-matan ba Aldeia Aisuco-Nuc purvolta metru 300.
“Difikuldade ne’ebé badaen sira enfrenta mak bee. Badaen sira cor tanke tenke lalin bee husi mota mak uza ba serbisu. Tan ne’e mak servisu tarde, maibé ba materiál ne’e ha’u sente laiha problema,” Eduardo informa.
Nia dehan, bainhira melloramentu sistema bee-moos ne’e ramata sei la kanaliza ba kada uma-kain, maibé fahe ba kada uma lima.
Enkuantu, obra PNDS ba reabilitasuan sistema melloramentu bee-moos ne’ebé implementa iha Aldeia Aisuco-Nuc, Suku Uma-Tolu ho sistema bomba sei gasta orsamentu totál hamutuk $23.291,65.
Obra referida konkluida sei benefísia komunidade hamutuk 465 husi uma-kain hamutuk 123, kompostu husi feto na’in-222 no mane na’in-243.
Jornalista: Vitorino Lopez da Costa
Editór: Xisto Freitas da Piedade
