DILI, 10 Setembru 2025 (TATOLI)-Komisaun B iha Parlamentu Nasionál ba asuntu Negósiu Estranjeiru no Defeza ho Seguransa, hein Governu atu submete proposta Lei Rejime Jurídiku Arte Marsiál.
Prezidente Komisaun B, Augusto Domingos ‘Deker’, dehan daudaun Governu kontinua suspende atividade ne’e, ho inisiativa ne’ebé iha ne’e parte Ezekutivu iha eskluzivamente kompeténsia haree ba nesesidade nasaun.
Nune’e, hodi bele regula di’ak liután atividade ne’e iha sosiedade, no Komisaun sei fó ninia hanoin bainhira simu ona lejislasaun referida hodi halo diskusaun públika.
“Atu regula di’ak, tenke mai husi Governu, bainhira Komisaun simu ona [inisiativa lei] mak ami bele fó komentáriu”, nia adianta.
Deputadu membru Komisaun B, Natalino dos Santos, konsidera lejislasaun ne’e importante tebes hodi bele regula didi’ak prátika arte marsiál iha rai-laran.
Relembra katak, iha 30 Jullu 2025, Governu aprova ona proposta-lei kona-ba Rejime Jurídiku Arte Marsiál ne’ebé aprrezenta husi Ministru Interiór, Francisco da Costa Guterres, ne’ebé sei hato’o ba Parlamentu Nasionál.
Objetivu husi inisiativa lejizlativa ida-ne’e mak atu estabelese rejime jurídiku ida ne’ebé klaru ba ensinu aprendizajen no prátika arte marsiál iha Timor-Leste, hodi asegura katak atividade ne’e hala’o ho seguru, ordenadu no tuir prinsípiu orden públika nian.
No atu prevene no kombate violénsia ne’ebé asosiadu ho prátika arte marsiál, liuliu entre joven sira, liuhusi kria mekanizmu monitorizasaun, fiskalizasaun no responsabilizasaun ne’ebé efikás ba sentru, klube, no ajente sira-ne’ebé envolve.
Entretantu ho proposta-lei ida-ne’e, Governu hakarak atu salvaguarda arte marsiál sira-nia karáter desportivu no kulturál, hodi promove sira-nia prátika ne’ebé responsavel no kontribui ba seguransa no moris-di’ak sosiedade timoroan nian.
Notísia relevante: https://tatoli.tl/2025/07/30/km-aprova-proposta-lei-rejime-juridiku-arte-marsial/
Jornalista: Nelson de Sousa
Editora: Maria Auxiliadora
