BOBONARU, 17 Setembru 2025 (TATOLI)-Xefe Sentru Saúde Komunitáriu (SSK), postu administrativu Maliana, munisípiu Bobonaru, Nascimento Mau Leto, husu ba empreza Majoma Gomes Unipessoal Lda atu aselera projetu konstrusaun sala maternidade, tanba tempu kontratu liu ona iha fulan-Agostu 2025 ne’e.
Nascimento observa implementasaun obra ne’e di’ak no kualidade, maibé presiza finaliza lalais konstrusaun ne’e, tanba tempu badak udan tau no sei difikulta serbisu hodi atraza projetu ne’e.
“Nia problema mak fó kontratu fulan tolu, sira hahú iha maiu to’o agora. Fulan hira nia laran seidauk taka ne’e maka ita preokupa. Ami sentru saude hein hela oinsá obra ne’e bele hotu lalais para bele fó espasu hodi ami halo servisu ho di’ak, tanba iha fatin oan ne’e kloot, ami barak book-an la di’ak. Dalaruma inan isin-rua, partu ne’e ami sempre haruka bá ospitál, ema iha ne’ebá dalaruma hirus ami dehan imi la halo serbisu”, nia informa ohin.
Resoponsavel ne’e fiar katak obra ne’e finaliza parteira sira bele uza espasu foun halo atendimentu ba inan isin-rua sira ne’ebé atu partu, la’ós de’it atende komunidade postu Maliana, maibé ba mós komunidade husi postu administrativu Atabae no Kailaku.
“Sira mós hela besik área Maliana, kuandu sira presiza kontaktu mai ami-nia ambulánsia bá foti”, katak Nascimento.
Iha sorin seluk, enjeñeiru empreza Majoma Gomes Unip. Lda., Adriano Gonçalves Pina,
rekuñese implementasaun obra ne’e la’o atraza, tanba problema ho traballadór.
“Ami halo kontratu ho sira, depois sira lakohi, entaun ami bolu fali ema husi fatin seluk mak mai, ddespois sira mai protesta hapara tiha serbisu kuaze semana tolu ne’e mak tarde”, katak.
Adriano Pina konfirma katak dadaun ne’e obra fizika atinje ona 38% no hetan ona estensaun kontratu husi Diresaun Servisu Munisipál Planu Dezemvolvimentu Integradu Munisipál (PDIM) to’o fulan dezembru 2025.
“Ninia serbisu hela de’it atap ne’e. Materiál mós diretór kompañia sosa hotu ona iha Dili mak hanesan besi, kuda-kuda no seluk tan, parese aban to’o ona lokasi hodi badaen sira bo’ok servisu, ami fiar Dezembru ne’e bele hotu”, nia garante.
Enkuantu Obra ne’e konstrui liuhusi orsamentu Planu Dezembolvimentu Integradu Munisipál (PDIM) 2025 ho montante $108.003,29.
Jornalista: Sergio da Cruz
Editora: Maria Auxiliadora
