DILI, 18 Setembru 2025 (TATOLI)-Tuir ajenda Parlamentu Nasionál, iha loron 19 Setembru 2025, sei halo diskusaun no votasaun ba pedidu urjénsia kona-ba projetu Lei númeru 10/VI(3a) Rejime Jurídiku Seguransa Sosiál ba Titulár Órgan Soberania.
Iha loron 17 Setembru 2025, bankada parlamentár sira ho manifestante husi Estudante Universitáriu Timor-Leste (EUTL) iha konkordánsia asina ona akordu ida atu inisia diskusaun halakon pensaun mensál vitalísia.
Biban ne’e, deputadu proponente abaixu asinadu na’in-10 kompostu husi FRETILIN ualu no PLP rua prepara projetu lei númeru 10/VI(3a) Rejime Jurídiku Seguransa Sosiál ba Titulár Órgaun Soberania submete ba meza Parlamentu ho pedidu urjénsia.
Nune’e, meza Parlamentu baixa kedas inisiativa ne’e tuir tramitasaun legál iha rejimentu Parlamentu hodi fó andamentu baixa ba Komisaun A trata Asuntu Konstituisionál no Justisa hodi halo apresiasaun no relatóriu pareser durante oras 24 nian laran no sei debate jeneralidade iha 25 Setembru.
Tuir rejimentu, sei halo diskusaun no aprovasaun iha plenária ba pedidu urjénsia hodi kontinua prosesu tuirmai.
Tuir testu projetu-lei ne’e atu revoga lei vijente [atuál] ba artigu 15-A, 16, 17, 19-A, 30, 31, 31-A, 32 no 33 no númeru 2 artigu 16 husi Lei númeru 7/2007, 25 Jullu, altera husi Lei númeru 7/2017, loron 26 Abríl.
Deputada FRETILIN, Nurima Ribeiro Alkatiri, nu’udar proponente hateten projetu lei ne’ebé aprezenta atu halakon tiha Lei Pensaun Vitalísia.
“Iha lei ida-ne’e, iha artigu ne’ebé sei revoga [halakon] Lei Pensaun Vitalísia totalmente, signifika deputadu ka membru Governu sira sei submete ba seguransa sosiál hanesan traballadór hotu selu [kontribui ko’a]”, hateten.
Notisia relevante: https://tatoli.tl/2025/09/17/bankada-lima-no-eutl-asina-akordu-halakon-lei-pensaun-vitalisia-25-setembru-debate/
Jornalista: Nelson de Sousa
Editora: Maria Auxiliadora
