DILI, 22 Setembru 2025 (TATOLI)—Adjuntu Inspetór Jerál iha Ministériu Edukasaun (ME), Rodolfo Henrique Aparício dehan ema deskoñesidu sunu fasilidade eskola CAFE iha Likisá.
“Ami mós informa ba parte investigasaun Polísia Likisá ninian, ne’ebé oras ne’e daudaun sira halo hela prosesu investigasaun ba kestaun ema deskoñesidu sunu fasilidade eskola CAFE. Parte polísia hetan ona informasaun no ninia kontinuasaun polísia sira sei halo sira-nia servisu. Ita sei hein fali bainhira mak iha rezultadu,” nia dehan ba jornalista sira iha salaun Ian Martin Balide, Segunda ne’e.
Nia haktuir akontesimentu ne’e akontese iha Sesta (19/09) madrugada tuku rua ho balun.
“Ahi-han fasilidade eskola CAFE Likisá. Ita halo inspesaun jerál no halo konfirmasaun liuhusi Superintendente Edukasaun Munisipál katak bainhira fasilidade eskola ne’e ahi-han iha mós seguransa ida toba iha eskola kotuk no nia horon fali kurtiña (gorden) ne’ebé ahi-han mak halo seguransa ne’e halai sai mai haree afinál ema mak sunu kurtiña janela rua ninian, nune’e mak nia bá kuru bee hodi hamate ahi ne’e.
“Bainhira seguransa hamate ona ahi, halai sai mai iha varanda eskola ninian, haree ema na’in-rua deskoñesidu uza hotu maskra halai tun ba iha estrada, maibé nia fadigadu salva fasilidade entaun ema deskoñesidu halai lakon tiha. Ahi-han meza rua no gorden husi janela rua ninian. Entretantu, fasilidade sira seluk seguru,” Rodolfo esplika.
Jornalista: Osória Marques
Editór: Xisto Freitas da Piedade
