DILI, 23 Setembru 2025 (TATOLI)–Ministériu Transporte Komunikasaun (MTK) liuhusi Diresaun Nasionál Infranstrutura no Komunikasaun (DNIC, sigla portugés) halo ona instalasaun liña internet iha fatin 142 iha territóriu tomak nível postu administrativu.
Instalasaun ne’e iha sentru saúde 76 no eskola públika 66 hahú iha tinan 2024 to’o agora.
Diretór Nasionál Infraestrutura no Komunikasaun, Manuel Barreto Amaral hateten, daudaun ne’e prosesu instalasaun la’o hela no nia rede husi operadór telekomunikasaun Telkomsel ho nia kustu husi Fundu Infraestrutura ho montante millaun $3-resin.
“Kona-ba instalasaun liña internet ba nível suku sira, liuliu iha área remota ladún asesu ho di’ak,” Diretór informa ba Ajénsia TATOLI via telefónika, Tersa ne’e.
Notísia relevante : Liña internet monu afeta ba atendimentu ba pedidu emisaun pasaporte
DNIC nia papel mak atu fasilita koneksaun liña ba ajénsia Governu hotu hanesan eskola, postu saúde iha postu administrativu, suku no aldeia.
“Ligasaun sira ne’e la’ós halo dala-ida maibé etapa ba etapa. Tamba na’in ba sistema integradu jestaun suku no aldeia maka Ministériu Administrasaun Estatál no sira mós hetan ona formasaun kona-ba sistema ne’e rasik,” nia akresenta.
Diresaun ne’e iha planu instalasaun lina internet ba nível suku sira sei kompleta iha tinan 2029 ne’e.
Diretór ne’e dehan, iha meiu polítika seluk ne’ebé bele uza hanesan daudaun halo programa pilotu iha suku ne’ebe fora husi Dili, hanesan iha sede suku Hera, enkuantu iha Dili laran iha suku haat hanesan Kampung Alor, Bidau Santana, Maskarinhas, Kolmera, nune’e bainhira sistema integradu mai bele asesu husi sistema ne’e rasik.
“Kuaze 452 suku atu halo instalasaun ne’e mós presiza orsamentu ne’ebé boot nune’e solusaun téknika bele kompleta hotu iha tinan oin maibé depende ba polítika serbisu entre Ministériu Administrasaun Estatál no Ministériu Transporte Komunikasaun, signifika kona-ba kestaun tékniku laiha problema,” nia tenik.
Jornalista : Alexandra da Costa
Editora : Julia Chatarina
