KOVALIMA, 30 Setembru 2025 (TATOLI)-Diretór Autoridade Aduaneira munisípiu Kovalima to’o oras ne’e, seidauk simu lista bainaka VIP hosi Indonézia ne’ebé maka sei partisipa eventu festivál fronteira 2025 iha loron 8 to’o 11 fulan-outubru tinan ida ne’e.
“Ami seidauk simu lista, espera aban ka bainhira ami bele simu ona,nune’e ami bele hatene VIP hira maka atu partisipa atu nune’e ami bele halo preparasaun hodi simu bainaka iha fronteira Mota-Masin,” Diretór ne’e hateten ba jornalista sira iha salaun admnistrasaun munisípiu Kovalima, ohin.
Servisu Autoridedade Aduaneira iha Mota-Masin persiza hetan ona lista hosi Komisaun organizadora festivál fronteira 2025 nian, nune’e bele rejista hosi parte Indonézia nian ema na’in hira maka sei partisipa eventu ne’e iha Kovalima.
“Ami-nia preparasaun protokolu iha fronteira maka ba dahuluk ami tenke simu despaixu husi komisáriu Autoridade Aduaneira nune’e sasán no ema atu atu tama presiza rejista, no uja pasaporte no la uja pasaporte,”nia dehan.
Tuir Diretór ne’e katak lista partisipasaun hosi bainaka VIP sira iha eventu ne’e mós importante hodi fasilita servisu PNTL no F-FDTL atu asegura seguransa durante eventu ne’ebé organiza hosi Sekretáriu Estadu Arte no Kultura (SEAK) no Sentru Nasionál Chega (CNC-Sigla portugés) no servisu Autoridade Munisípiu Kovalima.
Iha parte seluk, Prezidente Autoridade Munisípiu Kovalima, Miguel Armada Cardoso, reforsa atu kontrola sidadaun sira ne’ebé maka partisipa eventu festival fronteira ne’e tenke uja pasaporte no presiza iha koñesimentu husi sira-nia autoridade rasik.
“Presiza iha lista nune’e fasil ita atu bele kontrola sira saida maka presiza atu lori tenke kontrola sidadaun sira ho sériu,” nia hateten.
Entertantu, oras ne’e daudaun Komisaun Organizadora Festivál Fronteira 2025, kria ona seksaun programa, aprezentasaun kultura, feira kulturál, dokumentasaun no publikasaun, lojístiku no konsumu, ptotokolér, relasaun públika, finansa, seguransa, desportu, saúde no jogu tradisionál.
Jornalsta: Celestina Teles
Editór: Florencio Miranda Ximenes
