BOBONARU, 01 Outubru 2025 (TATOLI)-Diresaun Servisu Munisipál Edukasaun (DSME) Bobonaru sei halo auditoria ba ezekusaun orsamentu ba Programa Merenda Eskolár (PME) iha Eskola Báziku Filiál (EBF) Lebos, suku Lebos, postu administrativu Lolotoe, tanba deskonfia implementadór sira komete infrasaun.
Kestaun ne’e hato’o husi Superintendente Edukasaun Autoridade Munisípiu Bobonaru, Noémia Antónia, liga ba preokupasaun inan-aman no xefe suku Lebos ne’ebé kestiona kona-ba problema estudante EBF Lebos ne’ebé kada loron lori bee husi uma bá ekola hodi prepara ba merenda eskolár.
“Programa Merenda Eskolár ne’e kada estudante iha direitu hetan sentavu $0,42. Sira hasai tiha sentavu $0,07 ba iha bee, ai, deterjente no transporte administrasaun. Agora, hela sentavu $0,35, hasai tiha sentavu $0,06 ba iha foos. Labarik sira iha direitu atu han hahán fó forsa, buras no fó protesaun ne’e iha sentavu $0,29. Se labarik lori tan ai ho bee, entaun osan ida $0,07 ne’e ba iha ne’ebé? Ida-ne’e nafatin akontese, ami sei tun halo audit ba sira”, nia informa ba jornalista sira, ohin.
Noémia afirma katak DSME mós sei foti medida imediata, tanba estudante sira-nia papél mak atu estuda no la’ós atu kuru-bee.
“Se hetan duni infrasaun sira hanesan, sira iha direitu atu devolve osan sira mál gastu ne’e, tanba labarik sir- nia direitu sentavu $0,07 ne’e ko’a ba sira. Osan ne’e ba ne’ebé?”, nia kestiona.
Aleinde ne’e, superintendente edukasaun ne’e mós relata katak liuhusi atividade inspesaun foin lalais ne’e, inspetór eskolar sira mós identifika fornesedór sira iha EBF Lebos fó hahán la tuir menú.
“Iha loron ida fornesedór sira prepara de’it mak paun-maran, depo’is ho nia medida ne’e ki’ik demais. Entaun, momentu ne’ebá inspetór xama atensaun kedas ba iha fornesedór atu tein tuir menú ne’ebé iha. Tanba paun-maran ne’e laiha menú, paun karik tenke aumenta tan legumes ruma, na’an ruma ka mantolu ruma ne’e mak loos. Se sira kontinua hanesan ne’e devolve osan ou la’e ko’a insentivu husi fornesedór ne’e rasik”, nia hakotu.
Tuir dadus tinan letivu 2025, EBF Lebos akumula estudante hamutuk na’in-124 no profesór hitu.
Notísia relevante: DSME Bobonaru koordena ho ME rezolve problema iha EBF Lebos
Jornalista: Sergio da Cruz
Editora: Maria Auxiliadora
