VIKEKE, 01 Outubru 2025 (TATOLI)—Diretór Servisu Saúde Munisípiu Vikeke, Aljacsono S. Maia relata Servisu Saúde Munisípiu (SSM) Vikeke iha trimestre datoluk (Jullu-Setembru) rejistu númeru moras ne’ebé aas liu mak Inspesaun Respiratória Aguda (ISPA) hamutuk 25.928.
“Kona-ba kazu moras ne’ebé aas iha trimestre datoluk ne’e, ami rejista kazu ISPA mak domina liu ho totál hamutuk 25.928. Moras sira seluk númeru tun. Kazu ISPA númeru aas tanba kauza husi rai-rahun afeta ba komunidade,” Aljacsono s. Maia ba TATOLI iha ninia kna’ar fatin, Postu Vikeke Vila, Kuarta ne’e.
Aljacsono hatutan komunidade afetada moras ISPA sira bá halo tratamentu iha sentru saúde no fasilidade postu saúde sira-ne’ebé lokaliza iha suku sira.
“Tratamentu ita haree di’ak tanba ita-nia pesoal saúde sira-ne’e atende ita-nia pasiente sira ho ai-moruk no ikus rekupera. Agora daudaun ne’e ita tama ba tempu bailoro, entaun rai-rahun barak. Komunidade lakohi uza máskara, tan ne’e mak afeta moras ISPA,” nia esplika.
Nia esplika prevensaun ba moras ISPA, komunidade tenke uza máskara nune’e labele afeta ba moras ISPA.
“Ami sempre sosializa ba ita-nia komunidade hodi halo prevensaun ba moras sira inklui moras ISPA. Moras ISPA ita atu prevene mak tenke uza máskara,” nia hato’o.
Kona-ba ai-moruk, Aljacsono informa, Servisu Saúde Munisípiu Vikeke estoke ai-sei sufisiente hodi fó atendimentu ba populasaun.
Tuir dadus, moras sira-ne’ebé rejista iha SSM Vikeke mak hanesan ISPA totál hamutuk 25.928, diareia hamutuk 3106, Scabeis rejistadu 1234, pneumonia hamutuk 732, moras kardiaka reumátika hamutuk 262, diareia ho raan rejistadu 204 no kazu tuberkoluse hamutuk 182.
Jornalista: Vitorino Lopez da Costa
Editór: Xisto Freitas da Piedade
