DILI, 08 2025 (TATOLI)- Ministru Interiór, Francisco da Costa Guterres, promete intensifika seguransa iha fronteira nune’e bele prevene atividade ilísitu no krime transnasionál inklui parajen ilegál sidadaun sira-nia iha fronteira.
Nia dehan, daudaun ne’e efetivu sira husi Unidade Patrullamentu Fronteira (UPF) kontinua halo serbisu hodi prevene krime ilísitu tanba foin lalais polísia kaer sigarru ilegál iha fronteira Suai no kilat manu.
“Fronteira ne’e ita kontrola hela, ita la kontrola karik hanesan iha Suai ne’e ita atu kaer ne’e la hetan. Maibé ita kontrola tanba konsege kaer, ita-nia efetivu sira ne’e serbisu di’ak ba oin, ita sei halo kontrolu másimu ita-nia fronteira,” Francisco Guterres hateten ba jornalista sira hafoin partisipa reuniaun Konsellu Ministru, iha Palásiu Governu, kuarta ne’e.
Nia esplika, atividade ilísitu ka kontra bandu sira ne’e ne’e tama loron loron, maibé polísia dala barak autoridade lakohi fó-sai ba públiku, hodi prevene kontinua halo serbisu vizilánsia ema sira ne’ebé hatama sasán ilegál.
“Ida-ne’e mak dalabarak ita halo, mas ida foin lalais iha Suai ne’e boot demais ne’e mak sira (polísia) fó-sai ba públiku ne’e,” nia katak.
Governante ne’e dehan, kestaun atividade ilísitu iha fronteira ne’e lá’os fallansu polísia nian, maibé ne’e aktu ne’ebé mai husi ema.
“Kestaun sira hanesan ne’e laiha fallansu ida, ha’u husu ba ita-boot ilegál ne’e sé mak regula, ita la regula ilegál, más ita tenke tau matan nafatin ba fronteira,” nia fó hanoin.
Rekorda fali fali katak, iha loron segunda (6/9) ne’e Komandu Polísia Nasionál Timor-Leste Komandu Munisipiu Kovalima halo apreensaun sigarru ilegál kaisa 389.
Jornalista: Natalino Costa
Editór: Evaristo Soares Martins
