Bolseiru na’in-49 sei kontinua estudu iha Indonézia
DILI, 10 Outubru 2025 (TATOLI)–Bolseiru na’in-49 sei kontinua sira-nia estudu iha Indonézia liuhosi programa bolsu estudu The Indonesian Aid Scholarship/TIAS) 2025 nian.
“Ha’u sente orgullu bainhira haree bolseiru sira-nia entusiazmu ne’ebé sei hala’o estudu iha Institut Teknologi Bandung (ITB), Universitas Indonesia (UI), Universidade Airlangga, Institut Teknologi Sepuluh Nopember (ITS) no Universidade Padjadjaran. Ita-boot sira maka futuru líder Timor-Leste nian,” Embaixadór Indonézia iha Timor-Leste, Okto Dorinus Manik, dehan iha serimónia despedida ne’ebé hala’o iha Sentru Kulturál Indonézia (PBI), Kaikoli, Sesta ne’e.
Nia subliña edukasaun mak xave importante ba futuru ida-ne’ebé di’akliu.
Entretantu, Reprezentante Diretór Fundu Internasionál ba Kooperasaun Dezenvolvimentu (LDKPI) AID Indonézia, Mashuri Syuaib esplika katak programa TIAS reprezenta kontribuisaun konkreta Indonézia nian ba kooperasaun dezenvolvimentu globál liuhosi subsídiu edukasionál ba nasaun belun sira iha rejiaun Ázia, Pasífika, Áfrika no Amérika Sentrál.
“Programa TIAS la’ós de’it apoiu atinjimentu hosi Objetivu sira Dezenvolvimentu Sustentavel nian (ODS), maibé mós hametin setór públiku iha nasaun parseiru sira no hametin relasaun intergovernamentál sira liuhosi rede ativu antigu alunu nian,” Mashuri afirma.
Nia hatutan, iha 2024, Universidade Indonézia simu estudante TIAS hamutuk 27, no iha tinan 2025, númeru aplikante sira aumenta maka’as, no hatudu konfiansa ne’ebé buras ba kualidade programa nian.
Iha biban ne’e, reprezentante bolseiru, Elisa de Fátima Freitas agradese no hein katak oportunidade ida-ne’e bele halo ponte ba amizade entre nasaun rua ne’e.
“Bolsu estudu ida-ne’e la’ós de’it kona-ba edukasaun, maibé mós kona-ba amizade, konfiansa no mehi sira-ne’ebé fahe ba ita-nia nasaun,” Elisa dehan.
Husi bolseiru na’in 49 ne’e, na’in 25 sei hala’o estudu iha nivel mestradu iha universidade sira hanesan ITB, UI, Universidade Gadjah Mada (UGM), Universidade Padjadjaran (UNPAD) no Universidade Nasionál Jestaun Dezastre (UNDIKNAS). Enkuantu, bolseiru na’in-15 sei hala’o estudu iha área lisensiatura iha universidade sira hanesan Universidade Airlangga, Universidade Muhammadiyah Malang, Universidade Muhammadiyah Surakarta no Universidade Telkom.
Aleinde ne’e, iha bolseiru hasai kursu ba Diploma (D3) na’in-hitu iha Politéknika Enjeñaria Agríkola Indonézia no estudante Lisensiatura Aplikada na’in rua iha Politéknika Ministériu Saúde iha Surakarta no Politéknika Ministériu Saúde iha Jogyakarta.
Hosi totál bolseiru ba tinan 2025 ne’e, sei hala’o estudu iha universidade 18 iha Indonézia ne’ebé kobre área oioin hanesan enjeñaria sivíl, teknolojia informasaun, saúde, ekonomia no agrikultura.
Lista universidade 18 ne’ebé simu estudante Timor-Leste ba bolsa estudu Indonesian Aid 2025 inklui ITB, ITS, Universidade IPB (Institutu Agrikultura Bogor) no UI.
Universidade sira seluk maka Universidade Gadjah Mada (UGM), Universidade Airlangga, Universidade Padjadjaran (UNPAD), Universidade Estadu Semarang (UNNES), Universidade Nasionál Edukasaun nian (UNDIKNAS) no Universidade Muhammadiyah Malang (UMM).
Muhammadiyah University of Surakarta (UMS), Atma Jaya University Yogyakarta, Gunadarma University, Telkom University, President University, Indonesian Agricultural Engineering Polytechnic (PEPI), Poltekkes Kemenkes Surakarta no Poltekkes Kemenkes Yogyakarta.
Jornalista: Osória Marques
Editór: Xisto Freitas da Piedade
