DILI, 09 Outubru 2025 (TATOLI)—Autotidade Inspesaun Fiskalizasaun Atividade Ekonómika no Sanitária Alimentár (AIFAESA) kontinua halo monitorizasaun ba ba operadór ekonómiku sira liuliu negosiante ambulante ne’ebé faan hahan “Nasi kuning” iha dalan ninin
Notísia Relevante: MS sujere negosiante faan hahan tasak iha dalan ninin garante ijiene
“Nune’e, atividade ida ohin ne’e ami kontinua halo monitorizasaun bazeia ba iha trimestre datoluk ne’e ita halo divulgasaun informasaun regra ijiéne ninia ba operadór ambulante sira, atu kumpre hodi garante ai-han ne’ebé sira faan saudavél ba konsumidór sira,” Diretór Departamentu Metreolojia Padronizasaun AIFAESA, João Franco Morato, hateten ba jornalista sira iha ninia kna’ar fatin, Matadoru, ohin.
Iha planu ba trimestre dahaat nian, nia dehan, AIFAESA sei halo monitorizasaun nafatin hodi haree sira kumpre ona ka lae regra sira-ne’e, maibé sira deteta negosiante barak mak komete ba infrasaun no sira mós deteta operadór ekonómiku na’in-haat (4) mak rejistu ona atividade negósiu no na’in-64 mak seidauk rejistu komersiál ba negósiu.
“Tanba ne’e, ami mós informa ona ba sira atu ba halo rejistu nogósiu iha SERVE, I.P no ekipa sei prepara relatóriu hodi hato’o ba Inspetora Jerál atu foti medida tuir mai, hanesan sansaun ruma,” mia dehan.
Operadór ekonómiku, Erna da Costa, hateten sira prontu koopera nafatin atu prepara atributu ne’ebé uza bainhira faan hahan iha dalan ninin hanesan luvas, máskara, xapeo no tenke tau bee fase liman ba konsumidór sira-ne’ebé sosa hahan.
“Hahan ne’ebé ami faan kuandu hotu ona ami ba tein fila-fali hodi faan kontinua to’o kalan hodi garante ijiéne ba konsumidór sira,” nia hateten.
Aleinde ne’e, iha Bekora kuandu oras meudia ne’e rai-rahun maka’as, tanba ne’e sira mós sosa masa tau hahan nia matan hodi taka, hamoos hela de’it masa (tempat taru makanan) nia lolon no matan, aleinde ne’e dadeersan sempre rega rai iha fatin negósiu nian.
Iha sorin seluk, negosiante hahan dalan ninin, Domingos Ximenes Guterres, hateten ho informasaun ne’ebé ohin AIFAESA hato’o bele ajuda sira atu prevene kondisaun ijiéne ba konsumidór sira, tanba ne’e sira prontu atu halo tuir regra ne’ebé ohin AIFAESA esplika.
“Loos duni, durante ne’e ami faan kauza máskara no luvas sira, tanba ne’e ba oin ami sei halo tuir no uza máskara inklui luvas loro-loron hodi garante ijiéne ba hahan ne’ebé ami faan,” nia dehan.
Enkuantu, atividade monitorizasaun ne’e hala’o durante loron rua hahú husi loron kinta-sesta (09-10 Outubru 2025) ne’ebe hala’o iha postu-administrativa haat hanesan Kristu Rei halo monitorizasaun ba negosiante na’in-17, Vera Kruz na’in-17, Dom Aleixo na’in-14 no Nain-Feto iha na’in-20.
Jornalista : Alexandra da Costa
Editór : Cancio Ximenes
