BALIBÓ, 11 Outubru 2025 (TATOLI)–Klube Duabesi FC sai manán-na’in hafoin kontra Klube Colégio Palaka FC ho skor 4-0 iha ámbitu jogu desportivu selebra loron “Balibo Five” ba da-50, ne’ebé hala’o iha Suku Balibó Vila, Postu Administrativu Balibó, Munisípiu Bobonaru, Sábadu ne’e.
Jogu ne’e hala’o nia abertura iha loron 20 Setembru to’o 11 Outubru 2025, ho objetivu atu selebra Loron Liberdade Imprensa, liuliu trajédia halakon jornalista estranjeiru na’in-lima nia vida husi militár Indonézia iha 16 Outubru 1975.
Jogu hetan apoiu fundu husi Ministériu Juventude, Desportu, Arte no Kultura (MJDAK) ho montante $2.500.
Tuir treinadór klube Duabesi FC, Nelson da Cruz hateten nia sente kontente tebes tanba jogadór sira hatudu sira-nia performe ne’ebé mak di’ak durante jogu, nune’e rezultadu ne’e sira hetan mós ho di’ak.
“Ha’u sempre fó hanoin ba sira atu joga ho kalma, labele hirus malu iha kampu laran, tenke atensaun tanba jogu ne’ebé di’ak depende ba ita-nia performe no emosionál,” treinadór ne’e informa ba TATOLI iha Balibó.
Nia haktuir durante ne’e Duabesi FC mós hetan vitória dala-tolu ona iha kompetisaun jogu desportivu sira antes ne’ebe hala’o iha Postu Balibó, no rezultadu ohin loron aumenta tan vitória ba dala-haat.
Iha biban ne’e, Kapitaun Klube Duabesi FC, Roberto Maia agradese ba motivasaun husi treinadór no kompromisu husi kolega jogadór sira-ne’ebé iha esforsu hodi hatudu performe di’ak durante kompetisaun.
“Tanba ne’e mak durante ami joga kontra klube seluk ami sempre manán, laiha empata ka lakon. Signifika ho jogadór hotu-hotu nia esforsu ami bele manán iha kompetisaun jogu desportivu ida-ne’e,” nia tenik.
Aleinde ne’e, nia reforsa katak durante jogu sira sempre hetan suporta maka’as husi adeptu sira-ne’ebé hakilar hodi fó korajen ba jogadór sira atu iha esperansa luta iha kampu laran.
Lembra katak klube ne’ebé kompete iha jogu ne’e hamutuk 16 mak hanesan FC Fatukakae Morutau United, Duabesi FC, São Gabriel FC, Malisesu FC, Santo Bernadino FC, Colégio Palaka FC, Mendadak FC, One Family FC, FC Union Joven Centro, Magarlelo FC, Dufagu FC, Mate Resto FC, FC Cruz Ren, Lafaek Fronteira FC, ESG Balibo FC no Matak Malirin FC.
Kompetisaun jogu desportivu ne’e Duabesi FC sai manán-na’in dahuluk ho montante $350, segundu lugár okupa husi klube Colégio Palaka FC ho montante $250, terseiru lugár husi klube Matak Malirin FC ho montante $150 no kuartu lugár husi One Family FC ho montante $100.
Jornalista: Alexandra da Costa
Editór: Xisto Freitas da Piedade
