AINARU, 13 Outubru 2025 (TATOLI) –Komunidade husi postu administrativu Maubisse, munisípiu Ainaru, husu Governu tau atensaun ba setór turizmu no agrikultura tanba setór rua ne’e bele troka fundu minarai iha futuru.
Nélio da Conceição, nu’udar abitante lokál Maubisse, husu Governu atu tau atensaun dezenvolve setór turizmu no agrikultura tanba munisípiu ne’e iha potensiál tebes.
Nia hato’o ezijénsia ne’e iha ámbitu diálogu komunitáriu liuhusi Programa Tatoli Hakbesik ho tema “Prezidente Ramos-Horta ho Povu” ne’ebé organiza husi Ajénsia Tatoli iha Pouzada Maubessi, segunda ne’e.
Nu’udar joven, Nélio preokupa ho Nasaun ne’ebé depedénsia maka’as ba fundu minanai, maibé setór ne’e la renovável nune’e nesesita duni dezenvolve setór produtivu ne’ebé iha sustentabilidade.
Hodi Orgullu prezensa Xefe Estadu nian hodi rona povu nia preokupasaun.
“Maubisse potensiál turizmu relijiozu, komunitáriu iha fatin barak hanesan Rabilau no seluk tan, rekomenda atu tau atensaun,” nia hato’o.
Nune’e mós xefe suku Aitutu, postu administrativu Maubisse, Gregorio Lopes Perreira, husu Governu sSentrál atu aselera prosesu desentralizasaun administrativa no podér lokál hodi fó podér tomak ba munisípiu sira hodi dezenvolve setór potensiál hanesan turizmu, agrikultura no seluk tan.
Tanba munisípiu iha pontensialidade.
Autoridade lokál ne’e husu mós ba Prezidente Repúblika atu tau atensaun bainhira Governu lori proposta Orsamentu Jerál Estadu (OJE) 2026 atu promulga haree alokasaun prioridade ba setór agrikultura.
Lia na’in Paulo Doutel Sarmento, dehan ho tema programa Hakbesik katak Estadu hakbesik no lori dezenvolvimentu mai povu.
Nia husu Governu atu tau atensaun ba divizaun administrativa hodi hakbesik dezenvolvimentu liután ba povu iha baze.
Tanba munisípiu Ainaru iha postu, suku no aldeia barak.
“Nune’e liafuan hakbesik ne’e hakbesik duni, hanesan Maubisse ne’e área rurál barak mak povu labele hakbesik mai postu,” nia preokupa.
Fernando Amorin, nu’udar joven husu tau atensaun reintegrasaun ba joven timoroan ne’ebé ba serbisu iha rai-li’ur bainhira fila mai hodi aplika fila-fali matenek ne’ebé hetan kontribui ba dezenvolvimentu país.
Maubisse sei sai sentru turístiku
Responde ba preokupasaun hirak-ne’e, Prezidente Repúblika (PR),
José Ramos-Horta, dehan Maubisse sei sai sentru turístiku boot tebes.
Nune’e sei husu bá Primeiru-Ministru, Xanana Gusmão hodi hamutuk ho ministériu kompetente atu dezenvolve.
“Maubisse klima di’ak tebes, turista hakarak mai,” nia dehan.
Horta observa mós merkadu Maubisse presiza hadi’a infraestrutura hodi iha kondisaun ba negosiante sira no presiza moderniza ospitál referénsia ne’ebé iha.
Durante diálogu, Xefe Estadu mós toka dezenvolvimentu ekonómiku la’o iha país, integrasaun país ba ASEAN ho merkadu ne’ebé boot, hodi subliña país iha dame no pás.
Jornalista: Nelson de Sousa
Editór : Evaristo Soares Martins
