DILI, 15 Outubru 2025 (TATOLI)—Governu liuhusi desizaun koletiva iha Konsellu Ministru deside autoriza Ministra Finansa, Santina José Rodrigues Ferreira Cardoso, atu halo negosiasaun ho Banku Aziátiku Dezenvolvimentu (ADB) kona-ba Akordu Empréstimu ho komponente subvensaun ba projetu hadi’a estrada nasionál faze dahuluk.
Projetu hadi’a estrada ne’e prevee orsamentu estimadu millaun $84,8, inklui modernizasaun kilómetru 42 husi estrada nasionál entre Lospalos ba Iliomar, projetu seluk reabilitasaun ba ponte tolu (Seisál, Borouai no Malailada) ne’ebé lokaliza entre Baukau ho Lautein,
Nune’e mós iha dokumentu ofisial deklara tan projetu implementasaun infraestrutura no reforsu institusionál hodi hametin reziliénsia klimátika komunidade iha suku neen ho risku aas neʼebé lokaliza entre Lospalos no Iliomar, ne’ebé vulneravel ba inundasaun no rai-maran.
Finansiadu prinsipalmente liuhusi empréstimu konsesionál millaun $75 no subvensaun millaun $3 husi banku ADB.
Enkuantu projetu ne’e ho objetivu atu hadi’a konektividade rodoviária, hasa’e seguransa no promove reziliénsia klimátika iha komunidade lokál sira, tuir Planu Estratéjiku Dezenvolvimentu 2011-2030 no ho meta nasionál atu adapta ba mudansa klimátika.
Tuir análize makroekonómika no fiskál, finansiamentu ida-ne’e la fó impaktu ba estabilidade orsamentál ka sustentabilidade dívida públika nasionál, ne’ebé mantein iha nivel prudente no menus liu duké limite referénsia internasionál.
Aleinde ne’e, kustu efetivu hosi totál empréstimu ne’ebé iha, ki’ik-liu retornu estimadu husi Fundu Petrolíferu Timor-Leste nian, ne’ebé garante katak rekursu ba finansiamentu ida-ne’e iha nafatin vantajen ekonómiku no sustentável, kontribui hodi halo investimentu estratéjiku sein fó impaktu ba ekilíbriu husi konta públika.
Jornalista : Alexandra da Costa
Editór : Cancio Ximenes
