BOBONARU, 15 Outubru 2025 (TATOLI) – Governu liuhusi Sekretáriu Estadu Komunikasaun Sosiál, Expedito dias Ximenes, kuarta ne’e halo lansamentu ba Rádiu Komunidade Fronteira Balibó, Munisípiu Bobonaru ho lema “Vóz ba fronteira hamutuk harii dame no dezembolvimentu liuhusi informasaun’, iha ámbitu komemorasaun trajédia Balibo five ba da-50 no loron liberdade imprensa ba datoluk.
Sekretáriu Estadu Komunikasaun Sosiál, Expedito Dias Ximenes, esplika, ezisténsia Rádiu Komunidade ne’e atu fo omenajen, respeita no valoriza sakrifísiu jornalista estranjeiru na’in- lima ne’ebé mate ho kruelidade iha Balibó 1975.
“Ita hotu hatene katak Jornalista na’in- lima husik hela sira-nia serbisu, husik hela sira-nia família ho sakrifísiu boot, defende lia-loos, defende ita-nia liberdade, defende direitu povu Timor-Leste nia, tanba ne’e edifísiu ne’e ita bele tau naran Rádiu Fronteira Fronteira Balibó five,” Expedito hateten iha nia intervensaun.
Ho ezisténsia Rádiu Balibó Five, Governante ne’e konfirma, daudaun ne’e ona rádiu komunidade hamutuk 22 mak eziste iha Timor-Leste.
SEKOMS estabelese rádiu ne’e atu responde ba planu prioridade ba Governu kona-bá dezenvolvimentu mídia lokál tanba konsidera katak tanba rádiu mak liña frente ba informasaun husi komunidade.
Nia husu ba jestór no jornalista sira halo atividaee kobertura 60% foka ba aktividade komunidade nia iha setór agrikultura, desportu no seluk tan nune’e bele hamoris liután rádiu ne’e sai nabilan ba futuru.
“Rádiu ida-ne’e labele sai instrumentu ba propaganda balu ke la apoia ba komunidade, tanba rádiu komunidade nia obejtivu prinsipál mak atu atende atividade komunidade, sé bainhira to’os na’in-ida hein karau. Ida-ne’e rádiu komunidade serbisu, atu halo kobertura, atu nune’e populasaun tenke sente katak rádiu komunidade ne’e ninia,” nia katak.
Sekretáriu Autoridade Munisípiu Bobonaru, Júlio Carvalho Caerro, sente orgullu no agradese ba governu tanba estabelese ona rádiu ne’e atubele divulga povu nia lian no povu bele rona dezenvolvimentu ne’ebé la’o iha territóriu laran tomak, espesialmente iha munisípiu Bobonaru.
“Ami Balibó sei utiliza didi’ak rádiu ne’e ho didi’ak, sei la inklui ba asaun Polítika nian, sei uza liu ba sosiedade nia interese,” nia fó hanoin.
Administradór Postu Administrativu Balibó, Casemiro Soares, sente kontente tanba esperansa povu Balibó atu iha rasik rádiu komunidade sai ona realidade.
“Ami agradese ba governu tanba rona duni ami komunidade postu Balibó nia halerik, kleur tebes, proposta hira ba mak ami hato’o ba maibé to’o fim iha tinan ne’e realiza duni rádiu ida-ne’e mai prezensa duni iha ami-nia leet,” nia katak.
Jestór Rádiu Komunidade Fronteira Balibó Five, Samuel dos Santos Saores, Dehan, rádiu ne’e nia frekuénsia kobre suku ne’ebé eziste iha postu administrativu Balibo, Mota-Ain inklui Atambua, Munisípiu Belu, Provínsia Nusa Tengara Timur (NTT) Indonezía.
Rádiu Komunidade Fronteira Balibó Five daudaun ne’e iha programa sira hanesan matan-matan ruik ‘dader-diak’, dedika muzíka favoritu.
Rádiu ne’e sei funsiona hahú husi dadeer tuku 06:00 no kalan tuku 08:30 foa ba atividade kreatividade agrikultura, labarik nia-lian, ita-nia kultura, joven no kreatividade, feto nia kreatividade, kuida ita-nia saúde, ita-nia kultura.
“Rádiu ne’e komunidade nian, signifika katak husi komunidade ba komunidade no fila-fali ba komunidade, ho objetivu mak oinsá ita atu foti informasaun husi ema ne’ebé lian-laek, kbiit laek, sira-nia lian ema la rona, entaun ita foti sira-nia lian fó ba ministériu relevante sira atu bele hatene preokupasaun ne’ebé Balibó hasoru,” nia akresenta.
Enkuantu serimónia lansamentu ne’e partisipa mós husi Prezidente Ajensía Notisioza Timor-leste TATOLI,IP, Noemio Mateus Falcão ho ekipa, Prezidente RTTL,EP, Prezidente Konsellu Imprensa, komunidade no jornalista rádiu komunidade iha territóriu laran tomak.
Jornalista: Sergio da Cruz
Editór: Evaristo Soares Martins
