OEKUSI, 17 Outubru 2025 (TATOLI) – Diresaun Rejionál Edukasaun no Solidariedade Sosiál Rejiaun Administrativa Espesiál Oekusi Ambeno (RAEOA), fó-sai sirkulár ida númeru referénsia 05/DRESS-RAEOA/IX/2025, dirije ba estudante sira ho funsionáriu públiku iha diresaun edukasaun kona-ba regulamentu legalizasaun diploma no asinatura deklarasaun kréditu ne’ebé konsidera importante atu kumpre.
Dokumentu ofisiál ne’ebé Ajénsia Tatoli,I.P asesu iha Diresaun Rejionál Edukasaun no Solidariedade Sosiál, ne’ebé asinadu hosi Diretór Vincencio Cono, katak, sirkulár referida dirije ba dirijente eskola sira iha nível hothotu no entidade públiku ho asuntu sirkulár legalizasaun diploma no asinatura deklarasaun kréditu ho klasifikasaun importante atu kumpre.
“Bazeia ba asuntu iha leten, Diresaun Rejionál Edukasaun no Solidaridade Sosial, fó sai sirkulár ba funsionáriu públiku no dirijente sira nível ensinu hot-hotu, atu fahe informasaun ba estudante, funsionáriu sira no entidade públiku katak, legalizasaun ba diploma no asinatura deklarasaun kréditu ba funsionariu públiku sira (profesór), sei la’o tuir nia prosedimentu,” sita iha sirkulár n’ebé Ajénsia Tatoli,I.P asesu iha Oekusi, ohin.
Notísia relevante:Garante kualidade apredizajen, Edukasaun Oekusi kontinua implementa programa EMuLi
Prosedimentu ne’ebé atu la’o tuir mak hanesan;
- Legalizasaun diploma, sei aprezenta kópia tahán lima no kompleta ho orijinál, sei hatama iha loron segunda to’o tersa-feira kada semana, iha oras tuku 08:30 to’o tuku 16:00 lorokraik, ba Ensinu Báziku Sentrál (EBC, sigla portugés) uza mapa kór azúl no Ensinu Sekundáriu jerál no tékniku vokasionál ho mapa kór kinur, fatin iha diresaun edukasaun no sei foti hikas iha loron kinta to’o sexta-feira iha oras tuku 14:00 to’o 16:00 lorokraik
- Foti deklarasaun kréditu ba funsionáriu públiku, hatama iha loron segunda to’o tersa-feira kada semana iha oras tuku 14:00 to’o tuku 14:00 lorokraik no sei asina iha loron kuarta no sei foti iha loron kinta to’o sexta-feira kada semana.
“Tanba saida mak ita halo ida-ne’e, tanba durante ne’e ema hotu hakarak mai ho urjénsia de’it, balun ba to’o uma, ne’e labele, tanba asina hothotu kona-ba deklasaun ka legalizasaun diploma tenke iha eskritóriu edukasaun tanba ne’e dokumentu ofisiál, ita só prioridade ba estudante ne’ebé hetan bolsu estudu, karik presiza urjénsia ita atende iha fatin ne’ebé de’it,” Diretór Diresaun Rejionál Edukasaun no Solidariedade Oekusi, Vincencio Cono, ba Ajénsia Tatoli, I.P iha Oekusi, ohin.
Autoridade ne’e hateten, bainhira simu ona kna’ar ka nomeasaun husi Konsellu-Ministru, tuir rezolusaun Governu númeru 36 no 37/2025/loron 28, fulan-Agostu, depois asumi kna’ar hodi lidera edukasaun Oekusi, liu loron haat, hahú iha loron 05 Setembru 2025, sirkulár ne’e fó sai ona ba públiku.
Define katak, loron segunda no tersa kada semana, estudante sira bele hatama diploma ho nia orijinál tenke aprezenta ba edukasaun bainhira atu halo legalizasaun diploma, no sei asina fali iha loron kuarta-feira, sei foti iha kinta no sexta-feira.
Hanesan mós deklarasaun kréditu, bele hatama iha loron segunda to’o tersa-feira kada semana, maibé la autoriza abandona serbisu prioridade iha prosesu ensinu aprendizajen to’o loron kuarta mak foin asina.
“Iha loron kuarta-feira kuandu asina hotu, la’os ejize atu foti kedas, maibé loron kinta no sexta mak foin bele foti,” nia afirma.
Notísia relevante:Estudante Oekusi rihun-tolu resin rejistadu sei partisipa ezame nasionál
Ezekutivu ne’e esplika, bainhira funsionáriu sira asesu ona deklarasaun kréditu, parte edukasaun mós aposta kedas mensajen maske simu osan Estadu kada fulan uitoan maibé presiza hadomi profisaun no limite atividade estrakurikulér hanesan negósiu tanba bele afeta abandona profissaun nu’udar manorin-na’in iha eskola.
“Ida-ne’e mak dalaruma sira mai atu asesu deklarasaun, ha’u sempre ko’alia ba sira atu kumpre, tanba ita deve Estadu maibé ita mós tenke selu Estadu liuhusi ita-nia dever morál, tenke hadomi ita-nia profisaun nu’udar manorin, funsionáriu ka servidór Estadu,” nia hateten.
Notísia relevante:Edukasaun Oekusi identifika ona suku ualu atu harii Ensinu Pré-Eskolár iha 2026
Entretantu, tuir dadus, dezde publikasaun sirkulár ne’e, hahú husi loron 05 Setembru to’o Outubru 2025 ne’e, estudante ne’ebé trata diploma ba legalizasaun besik-1000, no funsionáriu sira-ne’ebé trata dokumentu ba deklarasaun kréditu hamutuk 100-resin.
Jornalista: Abílio Elo Nini
Editór: Rafael Ximenes de A. Belo
