BOBONARU, 18 Outubru 2025 (TATOLI) –Ministru Obras Públika (MOP), Samuel Marçal, hamutuk ho ekipa halo observasaun ba progresu reabilitasaun estrada dirasaun no urbana iha postu-administrativu Maliana villa, bainhira atu ba halo inagurasaun ba eletrisidade iha suku Opa, postu-administrativu Lolotoe, munisípiu Bobonaru.
Hafoin viajen husi Dili to’o iha postu-administrativa Maliana Ministru Obras Públika, Samuel Marçal, kontinua halo observasaun no husu ba kompañia atu esforsu maka’as liután hodi finaliza lalais faze dahuluk nian hahú husi parte Nunura to’o iha Maliana villa.
“Ha’u fiar katak to’o fulan-Dezembru sira bele konklui ona hahú husi parte Nunura nian mai to’o iha Maliana villa, entaun drainajen mós ha’u haruka para Dezembru bele konklui maibe alkatraun ita haruka sira tau uluk atu evita rai uut”, Ministru ne’e informa ba jornalista sira iha Lolotoe, ohin.
Ministru dehan, karik kondisaun preparadu ona entaun sei nahe uluk alkatraun dahuluk, kontinua hadi’a kedas valeta no halo troiora atu fó espasu ba ema hodi la’o ain ba mai no sei kuda mós ai-oan ruma.
“Projetu reabilitasaun estrada ne’e fahe ba pakote rua ida estrada diresaun no ida estrada urbana, ne’ebé daudaun ne’e kuaze atinje ona 65% no horikalan mós kompañia komprometidu katak iha fulan-Dezembru sira sei atinje 90%”, Ministru informa.
Projetu ne’e fahe ba pakote rua, iha pakote reabilitasaun estrada dirasaun implementa husi kompańia PT. Hutama Karya ho orsamentu miliaun $21, enkuantu pakote ba reabilitasaun urbana responsabiliza husi kompañia PT. Bina Mitra no totál orsamentu miliaun $12.
Jornalista: Alexandra da Costa
Editór: Rafael Ximenes de A. Belo
