DILI, 20 Outubru 2025 (TATOLI)–Ekipa Maranatha Football Club (FC) kompromete sei evalua-aan hafoin derrota ho Buibere FC iha jornada dahuluk iha primeiru divizaun Liga Futeból Femininu Timor-Leste (LFFTL), iha Estádiu Munisipál Dili, Segunda ne’e.
Treinadór Prinsipál Maranatha FC, José Fernandito apresia ho jogadór sira mezmu derrota 6-0 tanba maiória jogadór foun no laiha esperiénsia entaun menus tékniku.
“Ha’u sei hadi’a iha jogu tuirmai,” Treinadór Prinsipál Maranatha FC informa ba TATOLI.
Notísia relevante: Buibere FC dere Maranatha 6-0
José haktuir ekipa Maranatha ninia preparasaun ho durasaun treinu fulan-ida resin no kondisaun kampu limitadu no oráriu treinu dala tolu (3) iha semana-ida.
Nia argumenta, pontu rua mak sei hadi’a hanesan hasa’e ritmu liuliu tékniku jogu no foku ba guarda rede ne’ebé konsideradu sai frakeza hodi rezulta derrota 6-0 kontra Buibere FC.
“Jogu tuirmai ami-nia jogadór foun sei reforsa ekipa,” José akresenta.
Entretantu, tuir kalendáriu, Maranatha FC sei hala’o jogu jornada daruak kontra Maudoko FC ne’ebé sei realiza iha fulan ne’e nia rohan iha Estádiu Munisipál Dili.
Jornalista: Natalino Belo
Editór: Xisto Freitas da Piedade
