DILI, 20 Outubru 2025 (TATOLI) – Komisaun C iha Parlamentu Nasionál ba asuntu Finansa Públika rekomenda ba Governu atu kontinua halo kapasitasaun rekursu umanu ba munisípiu sira hodi simu podér lokál.
Membru Komisaun C, Deputada Maria Angélica Rangel, hato’o kestaun ne’e bainhira halo audiénsia proposta Orsamentu Jerál Estadu (OJE) 2026 ho Ministériu Administrasaun Estatál (MAE) no autoridade munisípiu sira iha Parlamentu, segunda ne’e.
Nia dehan, tanba fiskalizasaun komisaun nian iha munisípiu sira balun nesesita duni kapasitasaun kontinua hodi eleva koñesimentu atubele presta serbisu ho kualidade.
Nia apoia orsamentu kada tinan ba munisípiu tau prioridade hodi aumenta tanba osan ne’e ba liu povu, maibé haree servidór Estadu nia kualidade tún.
“Forsa traballu ne’ebé ami ba haree iha munisípiu sira, hakarak ko’alia realidade katak, ami ba iha munisípiu balun di’ak duni, maibé munisípiu balun piór liután, oinsá ko’alia desentralizasaun no poder lokál,” nia kestiona.
Maibé munisípiu balun ninia forsa traballu laiha no laiha kuadru profisionál bele tau nível diretór sira.
“Ha’u, foti ezemplu ida ami ba (fiskalizasaun) munisípiu balun, aprezentasaun orsamentu munisípiu nian laiha kualidade ba iha Komisaun, ko’alia de’it la hatene, ne’e iha munisípiu Bobonaru uluk ho autoridade tuan, agora ha’u la hatene ho autoridade foun, aprezentasaun ami lori númeru ida, sira ko’alia númeru seluk, depois ko’alia Bahasa,” nia dehan.
Hodi salienta, aliende vizita ba Vikeke mós nota iha difikuldade no munisípiu balun mós seidauk di’ak maibé vizita fiskalizasaun ba fali iha Ermera, Baukau sira-nnia aprezenta di’ak tebes ho ema nível kualidade iha munisípiu nian.
“Tanba ne’e, tenke hadi’a nafatin, tanba ministru ko’alia kona-ba lei sira ita atu simu podér lokál, ita tenke prepara ita-nia ema atu halo jere munisipál sira,” Deputada Bankada FRETILIN ne’e rekomenda.
Nune’e mós Prezidente Komisaun C, Cedelízia Farria dos Santos, konkorda ho hanoin ne’e tanba bainhira halo fiskalizasaun iha munisípiu sira balun presiza mellora.
Ministru Administrasaun Estatál (MAE), Tomas Cabral, rejista preokupasaun maibé iha proposta OJE 2026 kontinua fó asisténsia téknika no formasaun ba munisípiu sira hodi simu podér lokál.
Notísia relevante : MAE kontinua prioriza preparasaun ba podér lokál
Jornalista : Nelson de Sousa
Editór : Evaristo Soares Martins
