VIKEKE, 22 Outubru 2025 (TATOLI)—Diretór Servisu Edukasaun Munisípiu (SEM) Vikeke, Júlio Sakadura informa prosesu ezame nasionál iha Ensinu Sekundáriu Filiál Daraloi, Aldeia Iraler, Suku Matahoi, Postu Uatulari la’o ho di’ak, laiha impedimentu ruma.
“Prosesu ezame nasionál iha Ensinu Sekundáriu Filiál Daraloi Iraler estudante partisipa hotu no prosesu ezame la’o ho di’ak, laiha ema ida mak halo boikota,” Júlio Sakadura ba TATOLI iha Postu Vikeke Vila, Kuarta ne’e.
Júlio haktuir ezame ne’e SEM Vikeke destaka ekipa ba iha kada eskola hodi tau-matan ka monitoriza ba realizasaun ezame nasionál.
Notísia relevante: ME distribui ona pontu ezame nasionál ba eskola iha territóriu
Iha fatin ketak, Koordenadór Realizasaun Ezame Nasionál iha Eskola Filiál Daraloi Iraler, Agostinho da Costa do Rosário, haktuir realizasaun ezame nasionál iha Eskola Daraloi la’o ho hakmatek no kontroladu maski antes ne’e mosu dezentendimentu, maibé hanesan timoroan sempre prontu atu koopera ho Estadu hodi realiza ezame nasionál.
“Futuru estudante sira-nian mak futura nasaun nian. Ha’u husu ba Ministériu Edukasaun liuliu Diresaun Jerál Ensinu Sekundáriu atubele hakbesik mai eskola ida-ne’e hodi fó solusaun ba estatutu eskola nian. Tanba laiha solusaun ba estatutu mak sei afeta ba prosesu aprendizajen iha tinan oin,” nia hato’o.
Tuir dadus, Eskola Sekudária Filiál Daraloi iha estudante ne’ebé partisipa iha ezame nasionál hamutuk na’in-49 kompostu husi Siénsia Teknolojia estudante hamutuk na’in-21 no Siénsia Sosiál no Umanidade estudante hamutuk na’in-28.
Jornalista: Vitorino Lopes da Costa
Editér: Xisto Freitas da Piedade
