VIKEKE, 29 Outubru 2025 (TATOLI)—Diretór Servisu Edukasaun Munisípiu Vikeke, Júlio Sakadura informa estudante finalista 2025 husi Munisípiu Vikeke humutuk na’in-16 mak la partisipa iha ezame nasionál.
“Ba ezame nasionál tinan 2025 ne’e ita-nia estudante finalista hamutuk na’in-16 mak lakohi partisipa ezame nasionál tanba balun moras no balun lakohi partisipa ezame. Ami konfirma ona estudante sira, maibé sira mak lakohi partisipa,” Júlio Sakadura dehan ba TATOLI iha Postu Administrativu Vikeke Vila, Kuarta ne’e.
Diretór Servisu Edukasaun Munisípiu Vikeke dehan, ezame daruak ba estudante na’in-16 iha Munisípiu Vikeke laiha ona tanba estudante sira-ne’e lakohi tuir.
“Pontu ezame nasionál iha Sesta semana kotuk ami lori ona bá nasionál,” Sakadura haktuir.
Hosi na’in-16 ne’e, Ensinu Báziku (EB) hamutuk 13, Ensinu Sekundáriu Jerál (ESJ) na’in-ida (1) no Ensinu Sekundáriu Tékniku Vokasionál (ESTV) iha na’in-rua (2).
Tuir dadus, estudante Munisípiu Vikeke ne’ebé partisipa ezame nasionál hamutuk 3.297, kompostu husi EB hamutuk 1.713, ESJ hamutuk 1.288 no ESTV hamutuk 296.
Jornalista: Vitorino Lopes da Costa
Editór: Xisto Freitas da Piedade
