KOVALIMA, 30 Outubru 2025 ( TATOLI)– Prezidente Autoridade Munisípiu Kovalima, Miguel Armada Cardoso hamutuk Koordenadór Komisaun Jestaun Dezastre Munisipál ho parseiru sira, realiza atividade hanesan kompetisaun pintura,simulasaun, kuis no distribui nesesidade bázika, Iha Suku Tashilin,Postu Administrivu Zumalai, Munisípiu Kovalima.
Autoridade Kovalima realiza atividade ne’e hodi komemora loron internasionál redusaun risku ba dezestre ho tema “Hamutuk Haforsa Komitmentu Finanseira ba Rezilénsia Komunidade Hodi Hasoru Perigu Sira”.
“Tuir loloos komemorasaun loron internasionál risku ne’e monu iha loron 13 Outobru, maibe ita nia tempu la biban, ita foin maka selebra loron referidu iha suku Tashilin. Autoridade Kovalima selebra loron risku dezastre ne’e ho atividade sira hanesan kompetisaun pintura kona-ba dezastre naturál entre alunu husi eskola Báziku filiál Pelet sai vensedor ba dahuluk Ramea vensedor ba daruak, Tashilin vensedor ba datoluk , Kulu-oan vensedor ba dahaat no Nalaop sai vensedór ba dalima,” Prezidente Autoridade munisípiu Kovalima, Miguel Armada Cardoso, hato’o liuhusi nia diskursu, iha EBC Tashilin, Zumalai.
Alende ne’e, realiza atividade kompetisaun kuis kona-ba dezastre naturál ba alunu no komunidade sira halo simulasaun kona-ba dezastre naturál no distribui nesesidade bázika ba família vulnerál sira iha Zumalai.
Iha biban ne’e, Autoridade fó hanoin ba komunidade sira iha suku Tashilin Kovalima rai tetuk, mota mós barak sai problema tanba ne’e dezastre naturál sempre akontese nune’e evakua komunidade sira.
Governu konstrui ona penahan, maibé komunidade nia papél ajuda estadu ne’ebé hatuur iha lei númeru 33/2008 kona-bá ijiene ordém públiku komunidade sira tenke halo limpeza ba baleta nune’e bele redus risku dezastre natural.
Iha sorin seluk, Koordenadór Komisaun Jestaun Dezastre Munisipál, Filomeno Cardoso reforsa katak loron internasionál redusaun risku ba dezestre ne’e loron importante hodi bele bele alerta ba sidadaun hotu atu esforsu redús risku dezastre naturál.
“Iha loron 13 Outobru, ne’ebé mundiálmente Nasaun Unidu estabelese ona iha 1989 liu ba hodi promove kona-ba kultura global konsénsia risku no redusaun risku hanesan inundasaun,elnino ,lamina no perigu seluk tan ne’ebé fó impkatu ameasa ba komunidade”nia dehan.
Koordenadór ne’e esplika, Autoridade selebra loron referidu tanba esforsu husi komunidade no parseiru dezenvolvimentu no Governu hotu iha mundu tomak atu hadia rejilénsia evita impaktu husi dezastre naturál
Tuir dadus iha fulan Maiu 2024 liuba família 123 afeta husi inundasaun no iha Fevereiru 2025, uma-kain neen hetan impaktu husi anin sobu no ahi han uma balun ne’ebé akontese iha Munisipiu Covalima. Covalima ho rai ne’ebé tetuk no foho no mota no bee sira, sai vulnerável ba mudansa klimátika.
Jornalista:Celestina Teles
Editór:Florencio Miranda Ximenes
