DILI, 30 Outubru 2025 (TATOLI)—FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), Kinta ne’e, halo formatura jerál hodi hahú halo operasaun konjunta hanaran Ouru Forsa Tarefa hodi garante seguransa iha territóriu nasionál, liuliu ba loron Finadu, Natál no Tinan Foun.
Forsa konjunta halo operasaun hodi garante segunsa nasionál, bazeia ba diretiva ne’ebé aprova ona iha Konsellu Ministru.
Iha Diskursu, Xefe Estadu Maiór Jenerál F-FDTL, Tenente Jenerál Falur Rate Laek hateten, F-FDTL no PNTL halibur malu nu’udar momentu istóriku, ne’ebé ultrapasa serimónia formatura simples atu reprezenta sinteze institusionál, nu’udar nasaun joven inkorpora iha Forsa Tarefa Konjunta, ne’ebé dezeña atu garante dame no hakmatek durante períodu krítiku.
“Diretiva polítika ne’ebé Konsellu Ministru aprova la’ós de’it dokumentu administrativu maibé marka estratéjiku ida-ne’ebé reafirma ita-nia maturidade institusionál,” Falur hateten durante formatura jerál iha ámbitu lansamentu operasaun konjunta, iha Unidade Espesiál Polísia (UEP).
Notísia relevante : Komandu F-FDTL no PNTL asina diretiva orden ba Operasaun Konjunta
Nia dehan, ekipa konjunta ne’e hetan tan responsabilidade adisionál ida, liuliu hafoin adezaun istórika Timor-Leste ba ASEAN iha loron 26 Outubru tinan ne’e iha Kuala Lumpur.
“Ita-nia trajetória nu’udar nasaun ida hatudu ho klaru katak susesu iha pilár fundamentál tolu hanesan respeitu, adezaun rigorozu ba kadeia komandu, no kapasidade atu serbisu hamutuk. Prinsípiu sira ne’ebé forma dezde tempu eroíku sira luta libertasaun nian, kontinua sai ita-nia matadalan ba institusionál,” nia katak.
Forsa Tarefa Konjunta entre F-FDTL no PNTL la’ós de’it reprezenta estratéjia operasionál ida maibé simboliza unidade nasionál.
“Ita-nia misaun ba períodu krítiku sira ne’ebé sei mai iha loron 28 Novembru, Finadu, Natál, no Tinan Foun nian – sei ezije husi ita idaidak tau sentidu a’as liu kona-ba responsabilidade institusionál no kompromisu ba dame,” Jenerál Falur katak.
Timor-Leste agora hetan observasaun Ia’ós de’it internalmente, maibé husi komunidade rejionál ne’ebé hein maturidade, profisionalizmu, no abilidade jestaun institusionál husi F-FDTL no PNTL.
“Ha’u hakarak subliña, respeitu ba malu, halo kolaborasaun institusionál mak setór sira ne’ebé sei lori ita ba susesu. Ne’e la’ós formalidade de’it, maibé dever sagradu ba ita-nia ezisténsia nu’udar instituisaun Estadu nian,” nia tenik.
Enkuantu, tuir Tenente Jerál Falur, pás la’ós kondisaun ida maibé prosesu konstrusaun ne’ebé kontinua, tanba ne’e sosiedade hotu maka ninia arkitetu prinsipál ba Timor-Leste nia dame no ba estabilidade.
Iha fatin hanesan, Komandante Jerál PNTL Komisáriu Jerál Polísia Henrique da Costa dehhan, atividade ohin hodi hala’o serbisu iha terrenu. Tuir loloos formatura ne’e hala’o ona iha semana hirak ba kotuk maibé tamba iha atividade iha rai-li’ur, nune’e ohin maka foin bele realiza.
“Atividade balun ne’ebé maka forsa rua implementa ona bazeia ba Rezolusaun Governu ne’ebé maka fó sai ona iha fulan rua ba kotuk, depoisde ida-ne’e ita-nia forsa rua sei halo movimentu hodi hatudu ba komunidade katak sira prontu para atu serbisu tanto iha preventive nomós repreziva ba situasaun saida de’it maka akontese,” nia hato’o.
Jornalista : Natalino Costa
Editora : Julia Chatarina
