DILI, 04 Novembru 2025 (TATOLI)–Komandandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes informa, durante selebrasaun loron boot hahú husi loron 01 to’o 02 Novembru 2025 rejista krime ualu.
“Husi krime ualu ne’e, ida akontese iha área Kristu Rei, hanesan kazu ofensa integridade fízika simples ho forma ida violénsia doméstika, akontese Dom Aleixo Munisípiu Dili iha kazu violasaun doméstika tolu no akontese kazu inséndiu ida-ne’ebé akontese iha Fatuhada Luru-Mata, estraga sasán akontese iha Taibesi Postu Administrativu Na’in-Feto tanba suspeitu lanu, akontese kazu maus tratus no ofensa integridade fízika ida hasoru menór ne’e akontese iha Vera- Krús inklui kazu asaltu malu iha Metinaru,” Komandante relata ba jornalista sira iha ninia knaar fatin, Eskudra Dom Aleixo, Tersa ne’e.
Notísia relevante : Tribunál julga Teófilo Caldas ba krime maus tratus ba kaben
Aleinde ne’e, Komandu PNTL Dili rejista asidente tráfegu hanesan, motór soke karreta ida iha área Praia dos Coqueiros, nune’e Departamentu Seguransa Rodaviária Munisípiu Dili halo hela atendimentu ba kazu ne’e.
“Kazu sira ne’ebé mak hanesan ofensa integridade fízika ne’e krime públiku, nune’e ita-nia investigadór sira daudaun ne’e kontinua halo investigasaun hodi aprezenta ba Ministériu Públiku,” Komandante Munisípiu Dili akresenta.
Maski nune’e, situasaun ein-jerál iha selebrasaun finadu iha loron 01 no 02 Novembru la’o di’ak.
“Ita-nia situasaun ein-jerál la’o di’ak, ita-nia komunidade karii ai-funan to’o tuku 10 kalan, laiha perturbasaun orden públiku iha momentu loron 01 no 02. Situsaun jerál iha kapitál Dili la’o di’ak tebes, ema hotu iha seguru nia laran, kari ai-funan ho seguru,” nia tenik.
Durante selebrasaun finadu, membru Polísia la detein ema ruma mai iha sela detensaun.
Jornalista : Natalino Costa
Editór : Evaristo Martins
